वीरगन्ज । नेपालको बहुराष्ट्रिय कम्पनी कन्साई नेरोलेक पेन्टले वीरगन्जको नारायणी अस्पतालमा मातृशिशु स्याहार कक्ष स्थापना गरिदिने भएको छ । कम्पनीको सामाजिक उत्तरदायित्व अन्तर्गतको रकमबाट नारायणी अस्पतालमा मातृशिशु स्याहार कक्ष निर्माण गरिदिने भएको हो ।
वीरगन्ज महानगरपालिकाको पहलमा नारायणी अस्पतालमा कम्पनीले मातृशिशु हेरचाह कक्ष स्थापना गर्न आईतबार त्रीपक्षीय सम्झौता गरेको छ । मातृशिशु स्याहार कक्ष स्थापना गर्न ३५ देखि ४० लाख लागत लाग्ने अनुमान रहेको कन्साई नेरोलेक पेन्ट्सका निर्देशक अशोक वैदले जानकारी दिनुभयो ।
वीरगन्ज पथलैया औद्योगिक करिडोरमा उद्योग सञ्चालनमा रहेको र नारायणी अस्पताल बारा, पर्सा, रौतहट, सर्लाही, हेटौडा लगायतका बिरामीहरुको उपचार केन्द्र पनि भएको सामाजिक उत्तारदायित्व अन्तर्गतको रकम अस्पतालमा लगाउ उचित लागेर नारायणी अस्पतालमा शिशु हेरचाह कक्ष निर्माण गर्ने निर्णय गरेको वैदले बताउनुभयो ।
कम्पनीले एकदेखि डेढ महिना भित्रमा सबै संरचना पूरा गरेर हस्तान्तरण गरिने वैदले बताउनुभयो । संरचना निर्माणका लागि कम्पनीको तर्फबाट कन्ट्री हेड मनोज मिश्र, नारायणी अस्पतालको तर्फबाट निमित्त मेडिकल सुपरिटेण्डेण्ट डाक्टर चितरञ्जन साह र वीरगन्ज महानगरपालिकाको तर्फकाट निमिक्त प्रमुख प्रशासकीय अधिकृत अरविन्दलाल कर्णले हस्ताक्षर गर्नुभएको छ ।
अस्पतालमा शिशु हेरचाह कक्ष स्थापना पछि वीरगन्ज लगायतका आसपास जिल्लाका सबैले सुविधा पाउने वैदले विश्वास व्यक्त गर्नुभयो । वीरगन्ज महानगरपालिकाका नगर प्रमुख राजेशमान सिंहले गरिब बिपन्न नागरिकको उपचार गर्ने एकमात्र भरोसाको केन्द्र नारायणी अस्पताललाई विभिन्न दाताहरुको सहयोगबाट सुविधा सम्पन्न बनाउनका लागि आफूले सक्दो पहलहरु गरिरहेको बताउनुभयो ।
नारायणी अस्पतालका निमिक्त मेडिकल सुपरिटेण्डेण्ट डाक्टर चितरञ्जन साहले कन्साई नेरोलेक कम्पनीको सहयोगले अस्पतालमा शिशु स्याहार कक्ष स्थापना भएमा मातृशिशु मृत्यु दर अझ कम हुनेमा विश्वास व्यक्त गर्नुभयो । उहाँले अस्पतालमा बिरामीहरुको चाप बढी रहेको र प्रसुती वार्डमा पनि भीड हुने गर्दा नवजात शिशु र आमालाई विभिन्न संक्रमण हुने जोखिम पनि हुने गरेकोले शिशु हेरचाह कक्ष स्थापनापछि यसले मातृशिशु स्वास्थ्यका लागि सहज हुने बताउनुभयो ।
अस्पतालमा दैनिक ८/९ वटा प्रसुतीको अपरेशन गर्नुपरिरहेको र उनीहरुलाई प्रसुतीपछि राख्ने सुरक्षित स्थानको अभाव भईरहेको अवस्थामा कम्पनीले निर्माण गरिदिने संरचनाले केही राहत पुग्ने डाक्टर साहले बताउनुभयो । अस्पताल विकास समितिका अध्यक्ष धिरज गुप्ताको अध्यक्षतामा भएको कार्यक्रममा पर्साका प्रमुख जिल्ला अधिकारी हिरालाल रेग्मी, कन्साई नेरोलेक पेन्ट्सका निर्देशक राजकुमार वैद विभिन्न संघ संस्थाका प्रतिनिधि र अस्पतालका कर्मचारीहरुको उपस्थिति रहेको थियो
