वीरगन्ज । पर्सामा नेकपा माओवादी केन्द्र पर्साको विशेष रुपान्ताराण अभियानको विस्तारित समिक्षा बैठक सम्पन्न भएको छ । राणीसति धर्मशालामा शनिबार सम्पन्न बैठकमा नेकपा माओवादी केन्द्रले तीनमहिना अघि शुरु गरेको ‘जन जनमा माओवादी, घर घरमा माओवादी, विशेष रुपान्तारण अभियान’ को समिक्षा गरिएको थियो ।
बैठकमा जिल्लाका १४ वटै स्थानीय तहका अध्यक्ष तथा कमाण्ड इञ्चार्जहरुले माओवादी पार्टीको गतिविधि र अवस्थाको बारेमा बैठकमा रिपोर्टिङ गरेका थिए । रिपोर्टिङका क्रममा अधिकांश पालिकाका नेतृत्वले पार्टीको अभियान जनस्तरसम्म पुग्न नसकेको नेतृत्वले पार्टीका सबैलाई समेट्न नसकेको गुनासो गरेका थिए । उनीहरुले नेकपा माओवादी केन्द्र विधि पद्धतिमा नहिडेको, पार्टी संगठन भित्र अनुशासन हराउदै गएको, विचार भन्दा दलाल प्रवृत्ति हावी भएको लगायतका गुनासोहरु राखेका थिए ।
पार्टी भित्रैका नेताहरुबीचको सम्बन्ध राम्रो नभएको र कार्यकर्ताहरुलाई पनि विभिन्न गुट उपगुटको भनेर ट्याग भिडाउने नेतृत्व पंक्तिबाट हुने गरेको, पार्टी भित्र नमिल्ने तर अन्य पार्टीका व्यक्तिहरुसँग मिलेर पार्टीलाई समाप्त पार्न खोज्नेहरु बढेको लगायतका गुनासोहरु गरेका छन् । सरकारको नेतृत्व पार्टीले गरिरहेपनि जनतालाई माओवादी केन्द्रको सरकार भएको अनुभूति नभएको भन्दै जनतासम्म पुग्नेगरी काम गर्न सरकारलाई पार्टीका नेताहरुले सुझाव दिनुपर्ने बताए ।
पार्टीका केन्द्रीय सल्लाहकार सदस्य एवं पूर्व जनसरकार प्रमुख रामआश्रय रामको अध्यक्षतामा भएको कार्यक्रममा पार्टीका केन्द्रीय सचिव एवं मधेस प्रदेश इञ्चार्ज लीलामणि पोख्रेल, विशेष रुपान्तरण अभियानका पर्सा संयोजक तथा पार्टीको स्थायी कमिटि सदस्य विश्वनाथ साह, बारा संयोजक प्रल्हाद बुढाथोकी, केन्द्रीय सदस्यहरु गीता कंडेल, जयराम दाहाल, प्रदेश कमिटि सदस्य छोटेलाल यादव, पिएल श्रेष्ठ लगायतको आतिथ्यता र १४ वटै पालिकाका अध्यक्ष, कमाण्ड इञ्चार्ज, चारवटौ निर्वाचन क्षेत्रका इञ्चार्ज, विभिन्न जनवर्गीय संगठनका इञ्चार्ज तथा अध्यक्षहरुको उपस्थिति रहेको थियो । कार्यक्रमको सञ्चालक पूर्व संयोजक रामदरश कुश्वाहाले गर्नुभएको थियो भने स्वागत पार्टीका नेता बालकृष्ण श्रेष्ठले गर्नुभएको थियो ।
