धनकुटा । इलामको श्रीअन्तु, तनहुँको मान्हुँकोट जस्तो धनकुटाको ध्वजे डाँडाबाट पनि सूर्योदयको देखिने गरेको छ । पूर्वको सबैभन्दा धेरै साक्षरता भएको जिल्लाको रुपमा स्थापित धनकुटा जिल्लाको छथरजोरपाटी गाउँपालिका वडा नम्बर २ मा रहेको ध्वजे डाँडा पहिले स्थानीय मगर, गुरुङ र शेर्पा समुदायको मृत्युपछि समाधि स्थल अहिले पर्यटकीय क्षेत्रको रुपमा विकास गरिएको छ ।
त्यहाँ वडा नम्बर २ को बजेटबाट जोरपाटी बजारदेखि ध्वजे डाँडासम्म सिँढी निर्माण गरिएको छ । डाँडामा लिम्बु समुदायको सिलामसाक्माको स्तम्भ र मगर समुदाय खुर्पेटोको स्तम्भ राखिएको छ । सिंढी र स्तम्भका लागि लागि गतबर्षको ५७ लाखको बजेट खर्च गरिएको वडा अध्यक्ष कृष्ण मगरले जानकारी दिनुभयो ।
यसबर्ष पनि थप बजेटको व्यावस्था गरेर अझै अन्य पर्यटकीय पूर्वाधारहरुको निर्माण गर्ने योजना भएपनि कोशी प्रदेश सरकारको अस्थिरताका कारणले प्रदेशबाट बजेट पार्न नसकेको उहाँले बताउनुभयो । तरपनि ध्वजे डाँडा लगायत छथरजोरपाटी गाउँपालिकाको पर्यटकीय क्षेत्रको विकासका लागि आफूले प्रयास भने जारी राखेको उहाँले बताउनुभयो ।
पर्यटकीय पूर्वाधार संरचना निर्माणपछि अहिले आन्तरिक र बाह्य पर्यटकहरु पनि आउन थालेको वडा अध्यक्ष कृष्ण मगरले बताउनुभयो । बिहीबार मात्रै दुईतिनजना पर्यटकले ध्वजे डाँडाबाट सूर्योदय अवलोकन गरेको वडा ध्यक्ष मगरले बताउनुभयो । विदेशी पर्यटकहरुले पनि ध्वजे डाँडा अवलोकन गरेपछि थप उत्साह थपिएको उहाँले बताउनुभयो ।
