वीरगन्ज । नेपालको भारतसँगको व्यापारमा देखिएका समस्या समाधान गर्न व्यापार सहजीकरणका लागि वीरगन्ज स्थित भारतीय महावाणिज्यदूतलाई बारा पर्सा औद्योगिक करिडोरका व्यावसायीहरुले माग गरेका छन् ।
नेपाल उद्योग वाणिज्य महासंघ मधेस प्रदेशले आयोजना गरेको नवआगन्तुक भारतीय महावाणिज्यदूत देवी सहाय मीनाको स्वागत तथा ‘नेपाल भारत व्यापार सम्बन्ध’ विषयक अन्तरकृया कार्यक्रममा सहभागी उद्योगी व्यावसायीहरुले नेपालको ७० प्रतिशत व्यापार भारतसँग रहेको भन्दै व्यापारमा देखिएका केही समस्याहरुको समाधान गरेर नेपाली व्यावसायीहरुलाई थप सेवा उपलब्ध गराए व्यापार थप बढ्ने बताए ।
नेपाल उद्योग वाणिज्य महासंघका केन्द्रीय कार्यकारिणी समिति सदस्य एवं व्यापार समितिका सभापति डा.सुवोध गुप्ताले नेपाल र भारतसँग आर्थिक, सामाजिक र धार्मिक सम्बन्ध रहेको बताउदै यसलाई अझ बलियो बनाउनुपर्नेमा जोड दिनुभयो । उहाँले भारतले नेपाललाई कृषिक्षेत्रको औद्योगिकरण र प्राविधिक सहयोग गरे थप व्यापार बढ्न सक्ने बताउनुभयो ।
अहिले धेरै नेपाली विद्यार्थीहरु भारतमा अध्ययनका लागि गएका र उनीहरुले भारतमा सिकेकका सीप र ज्ञानलाई नेपालमै उपयोग गर्न सके र त्यसका लागि थप प्राविधिक ज्ञान सीप सहयोगहरु आदान प्रदान गर्न सके नेपाल भारतको व्यापारिक साझेदारको रुपमा विकास गर्न सक्ने सम्भावना रहेको बताउनुभयो । उहाँले त्यसको लागि भारतले केही सहुलियत र व्यापारमा सहजीकरण गर्नुपर्ने बताउनुभयो ।
नेपाल उद्योग वाणिज्य महासंघ मधेस प्रदेशका निवर्तमान अध्यक्ष गणेश लाठले नेपाल र भारतको सम्बन्धको विषयमा सबै जानकार रहेको र अहिले नेपालमा देखिएको राजनीतिक अस्थिरता र आर्थिक संकटले नेपालका व्यावसायीहरु चिन्तित रहेको भन्दै यसले छिमेकी देश भारतमा पनि असर पर्ने सक्ने भएकोले यसतर्फ सचेत रहनुपर्ने बताउनुभयो ।
नेपाल उद्योग वाणिज्य महासंघ मधेस प्रदेशका अध्यक्ष अशोक टेमानीले भारतको विरुद्धमा नेपाली भूमिमा कुनैपनि गतिविधिहरु हुन नदिने प्रतिबद्धता जनाउदै नेपालको व्यापारको विकासमा भारतको महत्वपूर्ण रहेको बताउनुभयो । उहाँले दुवै देशका सीमाक्षेत्रका व्यावसायीहरुले ह्याप्पी बोर्डरको अवधारणा अगाडि सारेकोले यसलाई साकार बनाउन सहयोग गर्न आग्रह गर्नुभयो ।
भारतसँगको व्यापारमा सम्झौता भए अनुसारको काममा पनि केही समस्याहरु आउने गरेकोले त्यस्ता समस्याहरु फेरी दोहरिन नदिन दुवैतर्फ आपसी समझदारी र सहकार्य जरुरी रहेको बताउनुभयो । उहाँले नवआगन्तुक महावाणिज्यदूतले समन्वयकारी भूमिका खेल्नेमा विश्वास व्यक्त गर्नुभयो ।
उनीहरुले भारतका अस्पतालहरुमा उपचारका लागि जाँदा कहिलेकाही भारतीय रुपैंयाको सट्टामा डलरमा विनिमय गर्नुपर्ने बाध्यता सृजना गर्ने गरेको भन्दै यसको सहजीकरणका लागि पनि महावाणिज्यदूतसँग आग्रह गरेका छन् ।
भारतीय सीमाक्षेत्रका दरभंगा, पटना, गोरखपुर लगायतका स्थानबाट हवाई सेवा भएपनि वीरगन्जको रक्सोलबाट हवाई सेवा शुरु हुन नसक्दा नेपाली व्यावसायीहरुलाई व्यापारिक कामका लागि भारत जाँदा बढी समय लाग्ने गरेकोले रक्सोलबाट पनि हवाई सेवा सुरु गर्न आग्रह गरे ।
उनीहरुले रक्सोलबाट दिल्लीसम्मको एउटा छुट्टै द्रूतगतिको रेल सेवा दिनुपर्ने र त्यसमा नेपाली नागरिकहरुलाई लागि छुट तथा सहुलियतको व्यावस्था गर्नुपर्ने पनि माग गरे । कार्यक्रममा भारतीय महावाणिज्यदूत देवी सहाय मीनाले नेपाल र भारतको सम्बन्धलाई अझ बलियो बनाउन आफ्नोतर्फबाट सक्दो सहयोग र समन्वय रहने आश्वासन दिनुभयो ।
धेरै देशहरुमा बसेर काम गरेको अनुभव भएका मीनाले दुईदेशबीचको अन्योन्याश्रित सम्बन्धलाई कायम राख्नका लागि आफू प्रतिबद्ध रहेको र वीरगन्जको समग्र विकासमा पनि आफ्नो कार्यकालमा समस्या समाधान हुने र सम्बन्ध अझ सुधार हुने बताउनुभयो ।
वीरगन्ज उद्योग वाणिज्य संघका बरिष्ठ उपाध्यक्ष हरि गौतम, उपाध्यक्ष माधव राजपाल, पूर्व अध्यक्ष प्रदीप केडिया, कोषाध्यक्ष निरज अग्रवाल, कोषाध्क्ष शिवजी कलवार, जीतपुर सिमरा उद्योग वाणिज्य संघका निवर्तमान अध्यक्ष सञ्जय साह, बारा उद्योग वाणिज्य संघका अध्यक्ष राजकुमार साह लगायत उद्योगी व्यावसायीहरुले बोलेका थिए ।
