वीरगन्ज । मुलुकमा बढ्दो पेट्रोलियम संकट र कार्यसम्पादनलाई व्यवस्थित बनाउने उद्देश्यले सरकारले सरकारी कार्यालयको सेवा प्रवाह गर्ने समयमा परिवर्तन गरेको छ। आजदेखि देशभरका शैक्षिक संस्थाबाहेकका सम्पूर्ण सरकारी कार्यालयहरू बिहान ९ बजेदेखि साँझ ५ बजेसम्म सञ्चालनमा आउने भएका छन्।
सरकारले आइतबार नेपाल राजपत्रमा सूचना प्रकाशित गर्दै नयाँ कार्यतालिकाबारे जानकारी गराएको हो।
नयाँ व्यवस्थाका मुख्य बुँदाहरू:
कार्यालय समय: बिहान ९:०० बजेदेखि बेलुका ५:०० बजेसम्म (कात्तिक १६ देखि माघ १५ गतेसम्म भने ४:०० बजे बन्द हुने)।
हप्तामा दुई दिन बिदा: मध्यपूर्वमा जारी युद्धका कारण पेट्रोलियम पदार्थको संकट बढ्दै गएपछि इन्धन खपत कम गर्न मन्त्रिपरिषद्ले सरकारी कार्यालय र शैक्षिक संस्थामा हप्ताको दुई दिन बिदा दिने निर्णय गरेको छ।
बैंक तथा वित्तीय क्षेत्र: नेपाल राष्ट्र बैंकले पनि नयाँ कार्यतालिका लागू गरेको छ। जसअनुसार आइतबारदेखि बिहीबारसम्म बिहान ९:०० देखि ४:०० बजेसम्म र शुक्रबार बिहान ९:०० देखि ३:०० बजेसम्म कार्यालय सञ्चालन हुनेछन्।
इन्धनको बचत र सेवाग्राहीको चापलाई मध्यनजर गर्दै सरकारले यो कदम चालेको हो। यो नियम आजैदेखि लागू भइसकेको छ।
