वीरगन्ज । पर्साको पर्सागढी नगरपालिका वडा नम्बर ३ बिरुवा टोलमा श्रीमानको क्रुर आक्रमणबाट गम्भीर घाइते भएकी एक महिलालाई जिल्ला प्रहरी कार्यालय पर्साले आर्थिक सहायता उपलब्ध गराएको छ।
घरायसी विवादका क्रममा पर्साको पर्सागढी नगरपालिका वडा नम्बर ३ विरुवा टोलका ३० वर्षीय विश्वनाथ सहनीले आफ्नी २५ वर्षीया श्रीमती हरिकला देवी सहनीलाई धारिलो हतियार दाउ प्रहार गरी बायाँ खुट्टा काटेर बीभत्स अवस्थामा छाडी फरार भएका थिए।
घटनापछि पीडितको परिवार अत्यन्तै दयनीय आर्थिक अवस्थाबाट गुज्रिरहेको र उपचारमा समेत समस्या देखिएकाले जिल्ला प्रहरी कार्यालयले मानवीय संवेदनासहितको सक्रियतामा लैंगिक हिंसा नियन्त्रण सञ्जालको कोषबाट राहत स्वरुप आर्थिक सहयोग गरेको हो ।
विषम परिस्थितिमा पीडितलाई राहत पुऱ्याउने उद्देश्यले जिल्ला स्तरीय लैङ्गिक हिंसा सञ्जाल समिति कोषबाट आर्थिक सहयोग प्रदान गरिएको सञ्जालका संयोजक तथा पर्साका प्रहरी प्रमुख प्रहरी उपरीक्षक सुदीपराज पाठकले बताए ।
प्रहरी उपरीक्षक पाठकले सञ्चारकर्मीहरुको रोहबरमा पीडित हरिकला देवीका बुवा र आमालाई ५० हजार १०५ रुपैयाँको चेक हस्तान्तरण गरे । यो सहयोगले उपचाररत घाइतेको औषधि उपचारमा केही राहत पुग्ने विश्वास गरिएको छ।
लैंगिक हिंसामा परेकाहरुको सहयोगका लागि जिल्ला प्रहरी कार्यालय पर्साका प्रमुख संयोजक रहनेगरी लैंगिक हिंसा नियन्त्रण सञ्जाल गठन गरि त्यसमा कोष स्थापना गरिएको छ । उक्त कोषले लैंगिक हिंसामा परेका पीडितहरुलाई राहत उपलब्ध गराउनुका साथै अमानवीय र क्रुर हिंसा गर्नेहरुलाई कानूनी दायरमा ल्याएर कारवाही समेत गर्दै आएको छ ।
