चितवन, भरतपुर महानगरपालिका–गीतानगरमा बिहीबार बिहान भएको सवारी दुर्घटनामा एक जनाको मृत्यु भएको छ भने चार जना घाइते भएका छन्।
जिल्ला प्रहरी कार्यालय चितवनका अनुसार गीतानगरबाट भरतपुरतर्फ आउँदै गरेको ना १ ह नम्बरको अटोरिक्सालाई विपरीत दिशाबाट आएको स्कारपियोले ठक्कर दिएको हो।
दुर्घटनामा माडी नगरपालिका–७ निवासी ४४ वर्षीय मीनबहादुर खत्री गम्भीर घाइते भएका थिए। उनलाई उपचारका लागि चितवन मेडिकल कलेज पुर्याइए पनि उपचारकै क्रममा मृत्यु भएको प्रहरीले जनाएको छ।
अन्य चार जना घाइतेको सोही अस्पतालमा उपचार भइरहेको छ। उनीहरूको पहिचान खुल्ने क्रममा रहेको जनाइएको छ।
जिल्ला प्रहरी कार्यालय चितवनका प्रहरी नायब उपरीक्षक (डिएसपी) रवीन्द्र खनालका अनुसार बिहानको समयमा तीव्र गतिका कारण दुर्घटना भएको प्रारम्भिक अनुमान गरिएको छ।
“ठक्कर दिने स्कारपियो र त्यसका चालकलाई नियन्त्रणमा लिएका छौँ। घटनाबारे थप कानुनी अनुसन्धान भइरहेको छ,” डिएसपी खनालले जानकारी दिए।
दुर्घटनापछि केहीबेर प्रभावित बनेको सडक यातायात हाल सामान्य अवस्थामा रहेको प्रहरीले जनाएको छ।
