वीरगञ्ज । आगामी निर्वाचनको तयारीमा होमिएको राष्ट्रिय स्वतन्त्र पार्टी (रास्वपा) ले पर्सा क्षेत्र नम्बर–१ अन्तर्गत नगवामा भव्य घरदैलो कार्यक्रम सम्पन्न गरेको छ।
घरदैलोका क्रममा स्थानीय बासिन्दाहरूको उत्साहजनक सहभागिता देखिएको थियो । जसलाई रास्वपाले आफ्नो चुनावी अभियानको बलियो आधार मानेको छ। रास्वपा पर्साका सभापति एवं क्षेत्र नम्बर १ का उम्मेदवार हरि पन्तको नेतृत्वमा भएको उक्त कार्यक्रममा नगवाबासीले उल्लासमय स्वागत गर्दै साथ दिने प्रतिबद्धता जनाएका हुन्।
घरदैलो कार्यक्रमलाई सम्बोधन गर्दै उम्मेदवार हरि पन्तले अबको निर्वाचनमा नगवाका मतदाताहरूले परिवर्तनको पक्षमा उभिने विश्वास व्यक्त गरे ।
उनले रास्वपाको जित केवल एक व्यक्तिको जित नभई समग्र मुलुकको जित भएको उल्लेख गर्दै नगवाबासीको यो अपार माया र साथले आफ्नो जित सुनिश्चित गरिसकेको दाबी गरे ।
पन्तले यसपटक यहाँका जनताले आफ्नो मतमार्फत पुरानो अवस्था बदल्नेमा आफू पूर्ण ढुक्क रहेको समेत बताए ।
नगवाका टोल–टोलमा पुगेको रास्वपाको टोलीलाई स्थानीयले फूलमाला र अबिरले स्वागत गरेका थिए। चुनाव नजिकिँदै गर्दा रास्वपाले पर्सामा आफ्नो पकड बलियो बनाउँदै लगेको छ।
उक्त घरदैलो कार्यक्रममा रास्वपा पर्सा उपसभापति तुल्सा पौडेल, सचिव सुदिश प्रजापती, कोषाध्यक्ष दिलिप कुर्मी, महानगर सभापति अमन आलम, सचिव गौतम श्रेष्ठ, नेताहरू सन्दिप कुश्वाह, विशाल सिंह र माइकल सापकोटा लगायतको सक्रिय सहभागिता रहेको थियो।
कार्यक्रममा रास्वपाका जिल्ला तथा नगर तहका प्रभावशाली नेताहरूको बाक्लो उपस्थिति रहेको थियो।
