वीरगन्ज । सशस्त्र प्रहरी बल, नेपालले भन्सार छलि गरि भित्र्याईएको केरा बरामद गरि वीरगन्ज भन्सार कार्यालयमा बुझाएको छ ।
सशस्त्र प्रहरी बल, नेपाल नम्बर १३ गण हेडक्वार्टर पर्साको विशेष सूचनाका आधारमा सीमा सुरक्षा गुल्म वीरगञ्ज र वीरगञ्ज भन्सार कार्यालयको संयुक्त टोलीले भारतबाट भन्सार छली गरी ल्याइएको ठूलो परिमाणको केरा नियन्त्रणमा लिएर बुझाएको हो ।
संयुक्त टोलीले जिल्ला पर्सा, वीरगञ्ज महानगरपालिका वडा नम्बर १५, भिष्वास्थित नेशनल मेडिकल कलेज रोडमा रहेको मनिस फ्रुट सप्लायर्सको गोदाममा छापा मारेको थियो।
गोदामका सञ्चालक शम्भु कुमार गुप्ताले भारतबाट अवैध रूपमा ल्याई भण्डारण गरेको १५० क्यारेट केरा बरामद गरिएको सशस्त्र प्रहरीले जनाएको छ।
बरामद गरिएका केरा आवश्यक कारबाही तथा राजस्व दाखिलाका लागि वीरगञ्ज भन्सार कार्यालयमा बुझाइएको सूचना अधिकारी सशस्त्र प्रहरी नायव उपरीक्षक विश्वराज योञ्जनले जानकारी दिए ।
नेपालका किसानहरूले उत्पादन गरेका कृषिजन्य उपजले उचित मूल्य नपाएको र बजार भारतीय आयातित फलफूल तथा तरकारीले मात्र ओगटेको भन्ने गुनासो आइरहेका बेला सशस्त्र प्रहरी बल, नेपालले सीमा क्षेत्रमा यस्ता अवैध आयात नियन्त्रणको कार्यलाई अभियानकै रूपमा चलाएको छ।
अवैध आयात नियन्त्रणको अभियान सशस्त्र प्रहरी बल, नेपाल पर्साले सीमा अपराध नियन्त्रणलाई अभियानकै रूपमा सञ्चालन गर्दै आएको र आगामी दिनमा पनि यसलाई अझ प्रभावकारी बनाउँदै राजस्व अभिवृद्धिमा समेत योगदान पुर्याउने प्रतिबद्धता जनाएको छ।
