बिरगंज । रोट्रयाक्ट अभियानको इतिहासमा नयाँ कोषेढुङ्गा थप्दै रोट्र्याक्ट डिष्ट्रिक्ट ३२९२ को आयोजना र रोट्रयाक्ट क्लब अफ बिरगंजको आतिथ्यतामा वर्ष २०२५/२६ को “प्रथम अध्यक्ष–सचिव भेला” (पिएस मिट) बिरगंज महानगरपालिकामा भव्य रूपमा सम्पन्न भएको छ।
सन् १९९१ मार्च १३ मा रोट्र्याक्टर गोपाल खण्डेलवालको अध्यक्षतामा स्थापित रोट्रयाक्ट क्लब अफ बिरगंज नेपालकै पहिलो रोट्रयाक्ट क्लब हो। ३५ वर्षे गौरवमय यात्रापछि पहिलो पटक यस ऐतिहासिक क्लबले डिष्ट्रिक्ट कार्यक्रम आयोजना गर्ने अवसर पाएको हो।
सामाजिक उत्तरदायित्व, नवीन सोच र प्रभावकारी परियोजनाहरूमार्फत देशभर अग्रणी र प्रेरणादायी पहिचान बनाएको क्लबको लागि यो भेला ऐतिहासिक प्रतीकका रूपमा स्थापित भएको छ।
कार्तिक २२ गते शनिबार होटल भिस्वा, बिरगंजमा सम्पन्न भेलामा देशभरका करिब ४२५ जना रोट्रयाक्टरहरूको उत्साहपूर्ण सहभागिता रहेको थियो।
भेलाले रोट्रयाक्टरहरूबीचको सहकार्य, नेतृत्व विकास र मित्रताको सम्बन्धलाई अझ सुदृढ बनाउँदै “सेवामार्फत सहकार्य” (Fellowship Through Service) को भावनालाई व्यवहारिक रूपमा प्रस्तुत गर्यो।
सहभागीहरूले बिहानको खाजादेखि रात्री भोजसम्म वीरगंजको उत्कृष्ट आतिथ्य र स्थानीय स्वादको विशेष अनुभव लिएका थिए। कार्यक्रममा वीरगंज महानगरपालिकाका नगरप्रमुख राजेशमान सिंह प्रमुख अतिथिको रूपमा उपस्थित भएका थिए।
कार्यक्रमको अध्यक्षता रोट्र्याक्टर विवेक कुमार पटेलले गरेका थिए। कार्यक्रममा डिआरआर दिनेश गैरे, निवर्तमान डिआरआर बिक्रम क्षेत्री, पूर्व डिआरआर रोशन कार्की, रोटरी क्लब अफ बिरगंजका निर्वाचित अध्यक्ष राकेश मिश्र, रोटरी क्लब अफ बिरगंज मेट्रोपोलिसका अध्यक्ष रोटेरियन संजय जोशी, जे ड आर आर सौरभ बरनवाल लगायत विशिष्ट अतिथिहरूको उपस्थितिले कार्यक्रमलाई अझ भव्य र स्मरणीय बनाएको थियो।
कार्यक्रमका संयोजक डिआरआर एड आयुष गुप्ता को कुशल नेतृत्व, योजनात्मक सोच र उत्कृष्ट व्यवस्थापनका कारण कार्यक्रम अत्यन्त सफल, अनुकरणीय र प्रेरणादायी रूपमा सम्पन्न भएको हो । समापन सत्रमा आयुष गुप्ताले सबैको तर्फबाट धन्यवाद ज्ञापन गर्दै कार्यक्रमको औपचारिक समापन घोषणा गरे।
