रञ्जित पाण्डेय
वीरगन्ज । नेपाल प्रहरीले शुक्रबार देशभर ७०औं प्रहरी दिवस मनाएको छ। सोही अवसरमा नेपाल प्रहरी प्रदेश कार्यालय पर्सा, वीरगञ्जमा पनि श्रद्धाञ्जली तथा सम्मान कार्यक्रम सम्पन्न भएको छ ।
“नागरिक–प्रहरी सहकार्यः सुरक्षाका लागि अपरिहार्य” भन्ने मुल नाराका साथ मनाईएको प्रहरी दिवस
कार्यक्रमका प्रमुख अतिथि जिल्ला प्रशासन कार्यालय पर्साका प्रमुख जिल्ला अधिकारी तोय नारायण सुवेदीले उदघाटन गरेका थिए ।
प्रजिअ सुवेदी सहित सहभागी सबैले प्रदेश प्रहरी कार्यालयको प्राङ्गणमा निर्मित अमर प्रहरी स्मारकमा पुष्पहार अर्पण गर्दै शहीद प्रहरीप्रति श्रद्धाञ्जली अर्पण गरिएको थियो ।
कार्यक्रममा अमर शहीद प्रहरी परिवारजनहरूलाई दोसल्ला ओढाइ सम्मान गरिएको थियो। यो सम्मानले प्रहरी सेवामा आफ्नो ज्यान उत्सर्ग गर्ने वीर शहीदहरूको योगदानप्रति गहिरो कृतज्ञता र परिवारप्रति सम्मान प्रकट गरेको छ ।
प्रहरी दिवसको अवसरमा बोल्दै अधिकारीहरूले “प्रहरी र नागरिकबीचको सहकार्य नै शान्ति, सुरक्षा र समृद्ध समाजको जग भएको बताएका छन् ।
कार्यक्रमले प्रहरी सेवाको गौरव, अनुशासन र समर्पणलाई झल्काउने मात्र होइन, प्रहरी–नागरिक सहकार्यलाई अझ सुदृढ बनाउने सन्देश दिएको छ।
श्रद्धाञ्जली कार्यक्रममा पूर्व प्रहरी कर्मचारीहरू, अमर शहीद प्रहरी परिवारजनहरू, प्रहरी नायब उपरीक्षकहरु, जिल्ला प्रहरी कार्यालय पर्साका बरिष्ठ अधिकारी तथा प्रहरी कर्मचारीहरू, मातहत प्रहरी एकाइका प्रतिनिधिहरू र सञ्चारकर्मीहरूको सहभागिता रहेको थियो।
