वीरगञ्ज। वीरगञ्जमा चित्रांश युथ टिम वीरगञ्जको आयोजना तथा चित्रगुप्त समिति वीरगञ्जको प्रस्तुतिमा पहिलो ‘कायस्थ सुपर सिक्स नकआउट प्रतियोगिता–२०८२’ आयोजना हुने भएको छ।
वीरगन्जको गीतामन्दिर रोडमा रहेको चित्रगुप्त मन्दिरमा पत्रकार सम्मेलनको आयोजना गरेर प्रतियोगिताको आयोजना गर्न लागिएको जानकारी दिएको हो । चित्रांश परिवारका युवाहरूबीच आपसी सहयोग, खेलप्रतिको रुचि र सामाजिक एकता अभिवृद्धि गर्ने मुख्य उद्देश्यका साथ प्रतियोगिताको आयोजना गर्न लागिएको चित्रांश युवा समितिका अध्यक्ष राजन श्रीवास्तवले जानकारी दिए ।
प्रतियोगिता आउँदो कार्तिक ७ गते बिहान ७ बजेबाट वीरगञ्जको ज्ञानदा एकेडेमीको मैदानमा सुरु हुनेछ। प्रतियोगिता ‘सुपर सिक्स नॉकआउट’ प्रारूपमा खेलाइनेछ, जसमा वीरगञ्ज क्षेत्रका कुल १० टिमहरूको सहभागिता रहने कार्यक्रमका संयोजकहरू प्रकाश कर्णले बताए । उनका अनुसार सबै खेलहरू ५ ओभरको हुनेछन् र सम्पूर्ण प्रतियोगिता एकै दिनमा सम्पन्न गर्ने आयोजकको योजना रहेको छ।
पत्रकार सम्मेलनलगत्तै सहभागी टिमहरूका खेलाडीहरूको अक्सन (किनबेच) प्रक्रिया समेत सम्पन्न गरिने जानकारी आयोजक समितिले गराएको छ। प्रतियोगिताले कायस्थ समुदायका युवाहरूलाई खेलकुदको माध्यमबाट जोड्न र स्वस्थ प्रतिस्पर्धाको भावना विकास गर्न मद्दत पुग्ने चित्रगुप्त समितिका अध्यक्ष महेश दासले जानकारी दिए ।
