जनकपुरधाम । मधेस प्रदेशको मुख्यमन्त्रीमा जितेन्द्र सोनल नियुक्त भएका छन् । लोकतान्त्रिक समाजवादी पार्टीका मधेस प्रदेश अध्यक्ष तथा (लोसपा) का प्रदेश सांसद जितेन्द्र सोनललाई प्रदेश प्रमुख सुमित्रा सुवेदी भण्डारीले बुधबार संविधानको धारा १६८ को उपधारा (२) बमोजिम मुख्यमन्त्रीमा नियुक्त गरेकी हुन्।
नयाँ नेतृत्वका लागि प्रदेश प्रमुख भण्डारीले बुधबार बेलुकी चार बजेसम्म समयसीमा तोकेकी थिईन् । सोही समयभित्र, सोनलले नेपाली कांग्रेस र नेकपा (एमाले) बाहेकका ६ दलका ५७ प्रदेश सांसदको समर्थनसहित मुख्यमन्त्रीमा दावी पेश गरेका थिए।
प्रदेश प्रमुखको कार्यालयका अनुसार सोनारको नियुक्तिको जानकारी राष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालय, मुख्यमन्त्री तथा मन्त्रिपरिषद्को कार्यालय (मधेश प्रदेश) र मधेश प्रदेश सभा सचिवालयमा पठाइएको छ।
नयाँ मुख्यमन्त्रीका रूपमा सोनारले अब प्रदेश सरकार गठनको प्रक्रिया अघि बढाउनेछन्। राजनीतिक वृत्तका अनुसार उनले चाँडै मन्त्रिपरिषद् विस्तार गर्ने र प्रदेशको समग्र विकास, सुशासन र स्थायित्वलाई प्राथमिकता दिने बताएका छन्।
सोनारको नेतृत्वमा अब मधेश प्रदेशले नयाँ दिशा लिने अपेक्षा गरिएको छ। उनका निकट सहयोगीहरूले उनले प्रदेशमा सुशासन, सहकार्य र स्थायी राजनीतिक स्थिरतामा जोड दिने बताएका छन्।
जितेन्द्र सोनल यसअघि मधेश प्रदेशको कार्यकालमा लालबाबु राउत नेतृत्वको सरकारमा भौतिक पूर्वाधार तथा यातायात मन्त्री रहेका थिए । तत्कालिन राष्ट्रिय जनता पार्टी (राजपा) नेपालको तर्फबाट सांसद रहेका उनी तत्कालिन मन्त्री परिषदमा दोस्रो वरीयतामा रही काम गरिसकेका छन्।
बारा जिल्लाबाट लगातार दोस्रो पटक प्रत्यक्ष निर्वाचित प्रदेशसभा सदस्य रहेका सोनल लोसपाका संसदीय दलको नेताको रूपमा पनि काम गरिसकेका छन्। यसअघि उनी संघीय संसदमा समेत सदस्य भई काम गरिसकेका अनुभवी नेता हुन्।
मधेस आन्दोलनमा अग्रणी नेतृत्वमा रहेर काम गरेका सोनल राजनीतिक चरित्र निकै मिलनसार र सरल नेताका रुपमा चिनिन्छन् । उनी समकालिन राजनीतिमा पनि अरु भन्दा सालिन व्यक्तित्वको रुपमा परिचित छन् ।
नेपाली कांग्रेस र नेकपा एमाले सहितको समर्थनमा नेपाली कांग्रेसका कृष्ण यादवले पनि दावी पेश गरेका थिए । तर, उनको पक्षमा ५४ जना सांसद नपुगेपछि मुख्यमन्त्रीमा उनको दावी नै पुष्टि हुन सकेन ।
