वीरगन्ज । नेपाल सरकार, भन्सार विभागले वीरगन्ज भन्सार कार्यालयमा पनि ’भन्सार मूल्यांकन डाटावेस प्रणाली’ वीरगञ्ज भन्सार कार्यालयमा लागू गर्ने तयारी गरेकोमा वीरगन्ज उद्योग वाणिज्य संघ उत्साहित भएको छ ।
सरकारले विराटनगर भन्सार कार्यालयमा परिक्षणको रुपमा लागू गरेको प्रणालीको सकारात्मक परिणाम आएपछि विभागले वीरगञ्जमा पनि लागू गर्न लागेको हो ।
मंगलबार एकीकृत भन्सार जाँचचौकी, वीरगञ्जमा भन्सार विभागका महानिर्देशकले ‘भन्सार मूल्यांकन डाटाबेस प्रणाली’ राख्ने जानकारी गराएपछि वीरगञ्ज उद्योग वाणिज्य सङ्घ उत्साहित भएको जनाएको छ ।
’भन्सार मूल्यांकन डाटावेस प्रणाली’ लागू गर्ने विषयमा भन्सार विभागका महानिर्देशक श्याम प्रसाद भण्डारी, डाटाबेस विज्ञ निर्मल अधिकारी, लगायत भन्सार विभागका अधिकृत सहितको टोलीले मंगलबार वीरगन्ज भन्सार कार्यालयको पूर्व अनुगमन निरीक्षण गरेर फर्किएका छन् ।
सङ्घका अध्यक्ष हरिप्रसाद गौतमले ‘भन्सार मूल्यांकन डाटाबेस प्रणाली’ राख्ने सरकारको निर्णयले लामो समयदेखि भन्सार मूल्यांकन सम्बन्धमा निजीक्षेत्रसँग रहँदै आएको विवाद समाधान हुने र स्वच्छ तथा पारदर्शी कारोबार गर्ने व्यवसायीहरूका लागि व्यवसाय सरल भई विस्तार हुने विश्वास व्यक्त गरेका छन् ।
संघका अध्यक्ष गौतमले संस्थागत रुपमा नै विज्ञप्ति जारी गर्दै सरकारले लागू गर्न लागेको यस प्रणालीलाई सङ्घले पूर्णत सहयोग गर्ने र सम्पूर्ण उद्यमी व्यवसायीहरूलाई पनि सहयोग गर्न अभिप्रेरित गर्ने प्रतिबद्धता व्यक्त गरेका छन् ।
यसैगरी, भन्सार विभागले मिति २०८२/६/२४ मा गोरखापत्रमा आधिकारिक व्यावसायिक व्यक्ति (ट्रस्टेड ट्रेडर्स) को मान्यता प्राप्त गर्नका लागि दरखास्त आह्वान गरेकोमा पनि वीरगञ्ज उद्योग वाणिज्य सङ्घले स्वागत गरेको छ ।
सङ्घका अध्यक्ष गौतमले समाजमा विद्यमान राम्रा व्यवसायीहरूलाई मान्यता दिई उनीहरूको व्यवसायमा थप सरलीकरण गर्ने उद्देश्यले गरिएको ’ट्रस्टेड ट्रेडर्स’ को मान्यताका लागि आह्वान अत्यन्त सराहनीय रहेको बताएका छन् ।
उनले मापदण्डमा पर्ने सम्पूर्ण व्यवसायीलाई यसमा भाग लिई आफ्नो व्यवसायलाई प्रबद्र्धन गर्न आग्रह गरेका छन् । अध्यक्ष गौतमले वर्तमान परिप्रेक्ष्यमा सरकारले व्यावसायिक क्षेत्रमा राम्रो र नराम्रो व्यक्तिलाई छुट्ट्याई राम्रालाई प्रोत्साहन र नराम्रालाई सुधार गर्न जरुरी भैसकेको अवस्थामा यो व्यवस्था लागू गरेकोमा सरकारलाई धन्यवाद समेत दिएका छन् ।
