मकवानपुर। जिल्ला प्रहरी कार्यालय मकवानपुरले चौंतिस लाख मूल्य बराबरको अवैध सामान र पटका सहित दुईजनालाई नियन्त्रणमा लिएको छ ।
शुक्रबार बिहान करिब चौँतीस लाख रुपैयाँ बराबरको भन्सार छलीका कपडा र प्रतिबन्धित पटकाजन्य पदार्थहरू बरामद गर्नुका साथै ओसारपसारमा संलग्न दुई जनालाई नियन्त्रणमा लिएको हो ।
प्रहरी टोलीले शुक्रबार बिहान करिब ४ः१० बजे हेटौँडा उपमहानगरपालिका वडा नम्बर १५, रातोमाटेस्थित चार्जिङ स्टेशन अगाडिको पूर्व–पश्चिम सडक खण्डमा वीरगञ्जबाट हेटौँडातर्फ जाँदै गरेको मधेश प्रदेश ०३–००१ च ९०२३ नम्बरको योद्धा गाडीलाई शंकाको आधारमा रोकेको थियो।
गाडीका चालक रौतहट, बृन्दाबन नगरपालिका–९ बस्ने वर्ष २० का प्रदिप कुमार चौधरी र सोही गाडीमा सवार रौतहट, गरुडा नगरपालिका–४ बस्ने वर्ष ३१ का बिजय साहलाई नियन्त्रणमा लिई रितपूर्वक खानतलासी गर्दा गाडीको पछाडिको ढालाभित्र लुकाई छिपाई ल्याइएका ठूलो परिमाणका सामानहरू फेला परेका मकवानपुर प्रहरीले जनाएको छ ।
बरामद गरिएका सामानहरूमा करिब चौध लाख रुपैयाँ रु. १४ लाख बराबरको साडी १३० थान, कुर्था ६९६ थान र टप्स १७५ थान गरी जम्मा १,००१ थान भन्सार छलीका कपडा र करिब बीस लाख रुपैयाँ रु. २० लाख बराबरको झिरझिरे लगायतका प्रतिबन्धित पटकाजन्य पदार्थहरू रहेका छन्।
बरामद गरिएका दुवै प्रकारका अवैध सामानको कूल मूल्य करिब चौँतीस लाख रुपैयाँ रहेको प्रहरीले जनाएको छ। प्रहरीले सामान सहित नियन्त्रणमा लिईएका दुईजनानामाथि थप अनुसन्धान कार्य अगाडि बढाएको जिल्ला प्रहरी कार्यालय मकवानपुरले जानकारी दिएको छ।
