वीरगन्ज । वीरगन्ज महानगरपालिकाले चालु आर्थिक वर्ष २०८२/८३ को बजेट संशोधन गरी नगरका क्षतिग्रस्त संरचनाहरूको पुनर्निर्माणका लागि खर्च गर्ने निर्णय गरेको छ।
गत भदौ २४ गतेको ‘जेनजी आन्दोलन’का क्रममा महानगरपालिकाको कार्यालय भवनसहित अन्य भौतिक संरचनाहरूमा आगजनी र तोडफोड भएको थियो। यसैलाई सम्बोधन गर्न विशेष नगर सभाले विकास योजनाहरूका लागि विनियोजित बजेटलाई पुनर्निर्माणतर्फ स्थानान्तरण गर्ने प्रस्ताव सर्वसम्मतले पारित गरेको हो।
यस संशोधनअन्तर्गत, नगरस्तरीय पुँजीगत योजना र सामाजिक विकास कार्यक्रमहरूबाट रकम कटौती गरिएको छ। प्रमुख प्रशासकीय अधिकृत अरविन्दलाल कर्णका अनुसार, अब विकासका योजनाहरू स्थगित गरी पुनर्निर्माणका कार्यहरूलाई प्राथमिकता दिइने निर्णय गरेको छ।
यसैबीच महानगरपालिकाको यो निर्णयले विवाद निम्त्याएको छ। वडा अध्यक्षहरूले मेयर राजेशमान सिंहले बोलाएको विशेष अधिवेशनले विकास बजेट कटौती गरेर नयाँ गाडी खरिद गर्ने निर्णय गरेको भन्दै आपत्ति जनाएका छन्। उनीहरूको भनाइ अनुसार, जनताको आधारभूत आवश्यकता पूरा गर्ने योजनाहरूमा बजेट कटौती गरेर गाडी खरिद गर्नु उचित छैन र यसले जनतामाथि अन्याय गरेको छ।
वडा नं. २० का अध्यक्ष रामकिशोर सिंह परागका अनुसार, १२० करोडको विकास योजनामध्ये वडास्तरीय ३४ करोडको बजेटलाई समेत काटेर गाडी खरिदमा खर्च गर्नु गलत छ।
वडा अध्यक्षहरूले विगतमा पनि बोर्ड बैठकमा निर्णयहरूमा जथाभावि थप गर्ने, छलफल नगरी निर्णय सुनाउने र बजेट वितरणमा असमानता गर्ने गरेको आरोप लगाएका छन्। उनीहरूले महानगरले क्षतिको विवरण पनि ढिला गरी प्रस्तुत गरेको र वास्तविकभन्दा बढी (१ अर्ब १५ करोड) क्षति देखाइएको दाबी गरेका छन्।
‘जेनजी आन्दोलन’ र असहाब आलमलाई सहयोग
विशेष नगर सभाले ‘जेनजी आन्दोलन’का क्रममा काठमाडौंमा प्रहरीको गोली लागेर ज्यान गुमाएका वीरगन्ज वडा नं. १२ का युवा असहाब आलमको परिवारलाई ५ लाख रुपैयाँ आर्थिक सहयोग उपलब्ध गराउने निर्णय पनि सर्वसम्मतले पारित गरेको छ।
