वीरगन्ज । भ्रष्टाचार विरुद्ध आज जेन–जी पुस्ताले देशभर प्रदर्शन गरेको छ । देशमा व्याप्त भ्रष्टाचार र बेथिति विरुद्ध युवाहरु जुरुक्कै उठेका छन् । जब जब शासकहरु निरंकुश र तानाशाही हुदै जान्छन् उनीहरुलाई निरंकुश र तानाशाह हुनबाट रोक्न बौद्धिक जमातले आलोचना र विरोध गर्न थालेपछि उनीहरु आफूलाई सच्याउन बाध्य हुन्थे ।
राजनीतिक परिवर्तनमा कुनैबेला बौद्धिक जमात र नागरिक समाजको निकै ठूलो भूमिका थियो । २०६२/०६३ सालको आन्दोलनमा नागरिक समाज र बौद्धिक जमातको नेतृत्वमा नै १९ दिने आन्दोलन चलेको थियो । बौद्धिक समूह र पेशागत समूहको संयुक्त गठबन्धन बनाएर पेशागत महासंघ (पापड) को नेतृत्वमा आन्दोलन चल्यो ।
खुला सडकमा पापडका प्रतिनिधिहरु उर्लिएपछि आन्दोलनले उभार ल्याउथ्यो । जसले गर्दा सबैलाई आन्दोलित हुन प्रेरित गथ्र्यो । २०६२/०६३ को आन्दोलनपछि व्यावस्था परिवर्तन भयो । त्यसपछि शासकीय स्वरुप र राज्य पुर्नसंरचनाका लागि निकै ठूलो खिचातानी चल्यो जसले गर्दा २०६४ सालको पहिलो संविधानसभाको निर्वाचन विघटन हुन पुग्यो ।
त्यसपछि फेरी दोश्रो पटक २०७० सालमा संविधानसभाको निर्वाचन भयो । दोस्रो पटकको संविधानसभाको निर्वाचन पछि संविधान निर्माण प्रकृयामा फेरी देशका आधा जनसंख्या रहेको तराई मधेसमा असन्तुष्टि बढ्यो र धेसलाई जुरुक्कै उचाल्यो ।
त्यतिखेरदेखि नै देशमा बौद्धिकवर्ग र नागरिक समाजहरु बोल्न छाडे । त्यहिबेला देखि बौद्धिक जमातले आफ्नो मुख बन्द गरे । नागरिक समाज हराए । त्यसपछि देशमा बौद्धिक वर्ग भनिएका बुद्धिजीवि र नागरिक समाजको भूमिका क्रमशः देखिन छोड्यो ।
कारण जेसुकै भएपनि बौद्धिकवर्ग र नागरिक समाजको मौनताले राज्य सञ्चालन गर्ने शासकहरुमा मनमौजी गर्ने छुट पाउन थाले । उनीहरुमा तानाशाह र निरंकुशताको घमण्ड पैदा हुन थाल्यो ।
जसले गर्दा दोस्रो पटक अर्बौ खर्च गरेर सम्पन्न भएको संविधानसभाको निर्वाचन र त्यसपछि निर्माण भएको संविधानको समेत चीर हरण गरे । दुईदुईपटक संविधानले नै नचिनेको र परिकल्पना समेत नगरेको संसद विघटन ग-यो ।
देशमा भ्रष्टाचार र वेथितिको ग्राफ झन बढ्न थाल्यो । हुँदा हुँदा सरकार बिचौलियाको सेटिङमा बन्न थाल्यो । अनि युवा पुस्ता अर्थात अहिलेको जेन–जी पुस्तालाई सडकमा आउनुपर्ने बाध्यता बनायो । जसले आज देशभर प्रदर्शन गरिरहेका छन् ।
वर्तमान सरकारको नेतृत्व गर्ने दल नेकपा एमालेका अध्यक्ष केपी शर्मा ओली र नेपाली कांग्रेस सहितको दुईतिहाईको बलियो सरकार इतिहासकै भ्रष्ट र निकम्मा भएको भन्दै उनीहरु सडकमा उत्रिन बाध्य भएका छन् ।
आज सरकार विरुद्ध चर्को नारा लगाउदै देशभर जेन–पु्स्ता आन्दोलित भएका छन् । संयोग नेकपा एमालेको विधान महाधिवेशन गोदावरीमा चलिरहँदा क्रान्किारी गायक रामेश र मञ्जुलले गाएको ‘गाउँ गाउँबाट उठ, वस्ती वस्तीबाट उठ ! गीतमा हाउभाउ मिलाएर अध्यक्ष तथा प्रधानमम्त्री केपी ओली पनि गाईरहेका थिए ।
आज जेन–जी पुस्ताको आन्दोलनमा पनि त्यहि गीत गुञ्जिएको छ । फरक यति छ कि ! प्रधानमन्त्री ओली आफ्ना नेता कार्यकर्ताहरुलाई हौस्याउदै आफू पनि निकै हौसिएका थिए । आज जेन–जी पुस्ता त्यही गीत घन्काएर युवाहरुलाई भ्रष्टाचार र बेथिति विरुद्ध सडकमा आउन आह्वान गरिरहेका छन् ।
