रंजीत पाण्डेय
भदौ १४, काठमाडौं – नेपाल दलित मुक्ति मोर्चा, केन्द्रीय समितिको आयोजनामा आज काठमाडौंको पेरिसडाँडामा “नेपालमा दलित अधिकारको अवस्था, नीतिको विकास र कार्यान्वयनमा चुनौती” विषयक विचार गोष्ठी सम्पन्न भएको छ। कार्यक्रममा प्रमुख अतिथीका रुपमा नेकपा (माओवादी केन्द्र) का अध्यक्ष एवम् पूर्व प्रधानमन्त्री क. पुष्पकमल दाहाल ‘प्रचण्ड’ सहभागी भएका थिए।
गोष्ठीमा दलित अधिकारलाई सुनिश्चित गर्न विद्यमान कानुन र नीतिहरूको कार्यान्वयनमा देखिएका कमजोरी, सामाजिक विभेद अन्त्य गर्ने रणनीति तथा समान अवसरको वातावरण निर्माणबारे व्यापक छलफल भएको थियो।
विशिष्ट अतिथीका रुपमा वरिष्ठ नेता क. कृष्णबहादुर महरा, नेतृ पम्फा भुसाल, पूर्व सभामुख अग्नि सापकोटा, नेता शक्ति बस्नेत, मातृका यादव, हितमान शाक्य, अन्जना बिशन्खे, अथक, तिलक परियार, रणेन्द्र बराली, डा. यम किसान, जे.बी. बि.क. लगायत मोर्चाका पदाधिकारीहरूको सहभागिता रहेको थियो।
वक्ताहरूले दलित समुदाय अझै पनि सामाजिक विभेद, आर्थिक असमानता र संरचनागत अवरोधको चपेटामा रहेको उल्लेख गर्दै ठोस र प्रभावकारी नीतिगत कार्यान्वयन आवश्यक रहेकोमा जोड दिएका थिए।
प्रमुख अतिथि क. प्रचण्डले सम्बोधन गर्दै माओवादी आन्दोलनले दलित अधिकारलाई राजनीतिक एजेन्डा बनाएको स्मरण गराउँदै अबको चरणमा कानुनी व्यवस्था, समान अवसर र सामाजिक रूपान्तरण सुनिश्चित गर्न सबै दल, समाज र राज्य संयन्त्र गम्भीरतापूर्वक लाग्नुपर्ने धारणा राखे।
कार्यक्रमले दलित अधिकारका सवाललाई अझ मजबुत बनाउन मोर्चाले भावी रणनीति तय गर्ने र विभिन्न चरणका कार्यक्रम सञ्चालन गर्ने निर्णयसमेत गरेको छ।
