काठमाडौं –प्रधानमन्त्री केपी शर्मा ओली चीनको पाँच दिने भ्रमणका लागि शनिबार प्रस्थान गरेका छन्। उनी अहिले ७ बजे त्रिभुवन अन्तराष्ट्रिय विमास्थलबाट चीनका लागि प्रस्थान गरेका हुन् ।
प्रधानमन्त्री ओलीको भ्रमण टोलीलाई रक्षामन्त्री मानविर राई, गृहमन्त्री रमेश लेखक लगायतले विदाई गरेका छन् । चिनियाँ राष्ट्रपति सी जिनपिङको निमन्त्रणामा प्रधानमन्त्री ओली सांघाई सहयोग संगठन (एससीओ) को शिखर सम्मेलनमा भाग लिन चीन गएका हुन्।
प्रधानमन्त्री ओलीसँगै उनकी पत्नी राधिका शाक्य, शिक्षामन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, पूर्व उपप्रधानमन्त्री पूर्णबहादुर खड्का, प्रधानमन्त्रीका आर्थिक सल्लाहकार डा. युवराज खतिवडा, सांसद छबिलाल विश्वकर्मा र नेपाल सरकारका उच्च अधिकारीहरू पनि भ्रमण दलमा सहभागी छन्।
प्रधानमन्त्री ओलीले भ्रमणका क्रममा चिनियाँ राष्ट्रपति सी जिनपिङ र उपराष्ट्रपति हान चङसँग द्विपक्षीय भेटवार्ता गर्ने छन्। यस भेटमा दुई देशबीचको सम्बन्ध र आपसी हितका विषयमा छलफल हुनेछ।
उनले एससीओ शिखर सम्मेलनलाई सम्बोधन गर्ने र रुसका राष्ट्रपति भ्लादिमिर पुटिन, माल्दिभ्सका राष्ट्रपति डा. मोहम्मद मिज्जु, कम्बोडियाका प्रधानमन्त्री डा. सोमदेक मोहा बोरभोर तिपाहदे हुन महानेट, लाओसका प्रधानमन्त्री सोनेसाइ सिपानडोन र भियतनामका प्रधानमन्त्री फाम मिन चिङसँग पनि भेट गर्ने कार्यक्रम तय भएको छ।
भ्रमणको अन्तिम दिन प्रधानमन्त्री ओली बेइजिङमा आयोजना हुने ुफासीवादविरुद्धको विश्वयुद्ध र जापानी अतिक्रमणविरुद्धको चिनियाँ जनताको प्रतिरोधी युद्धको विजयको ८०औं वार्षिकोत्सवु समारोहमा सहभागी हुनेछन्।
यस समारोहमा ५० भन्दा बढी राष्ट्रका नेताहरूको सहभागिता रहने बताइएको छ।
