वीरगञ्ज– नेपाल अटोमोबाइल डिलर्स एशोसिएसन अफ नेपाल ‘नाडा’ मधेश प्रदेशको तेस्रो साधारण सभा र नयाँ कार्यसमितिको शपथग्रहण कार्यक्रम शुक्रबार सम्पन्न भएको छ।
कार्यक्रमका प्रमुख अतिथि नाडाका केन्द्रीय अध्यक्ष करण चौधरीले उद्घाटन गरेका थिए । उनले नाडालाई चाँडै महासंघमा परिणत गर्ने घोषणा गर्दै यसले अन्तर्राष्ट्रिय मान्यता पाएको दाबी गरे।
उनले खुला सिमानाबाट भइरहेको अवैध पार्टपुर्जाको व्यापार रोक्न सुरक्षा निकायलाई सहयोग गर्न आग्रह गर्दै नाडालाई थप बलियो बनाउन सबैको सामूहिक प्रयास आवश्यक रहेको बताए।
तेश्रो साधारणसभाले राहुल अग्रवालको अध्यक्षतामा २२ सदस्यीय नाडा मधेश प्रदेशको नयाँ कार्यसमिति चयन गर्नुका साथै शुक्रबार नै ग्रहण समेत सम्पन्न भएको छ ।
समितिको प्रथम उपाध्यक्षमा विवेक अग्रवाल, दोस्रो उपाध्यक्षमा सन्तोष जयसवाल, तेस्रो उपाध्यषमा बिकाश ठाकुर र चौथो उपाध्यक्षमा किशोर भट्टराई चयन भएका छन्।
त्यस्तै, सचिवमा अभिषेक चौधरी, सहसचिवमा मुरारी रौनियार, कोषाध्यक्षमा दिपेन्द्र खेतान र सहकोषाध्यक्षमा बिरेन्द्र रौनियार रहेका छन्। यसबाहेक, राजु गुप्ता जनसम्पर्क अधिकृत र सन्दीप अग्रवाललाई मिडिया कोअर्डिनेटरको जिम्मेवारी दिईएको छ ।
शपथ ग्रहणपछि नवनिर्वाचित अध्यक्ष राहुल अग्रवालले आफ्नो दुई वर्षे कार्यकालमा मधेश प्रदेश कमिटीलाई देशभरिकै नमुना समिति बनाउने प्रतिबद्धता व्यक्त गरे।
उनले आफ्नो कार्यकालमा पारदर्शी सहकार्य, कर प्रणाली सुधार, विद्युतीय सवारी साधनलाई प्रोत्साहन र बैंकिङ तथा बीमा क्षेत्रमा सुधार लगायतका क्षेत्रमा काम गर्ने योजना सार्वजनिक गरे।
कार्यक्रममा पर्साका प्रमुख जिल्ला अधिकारी तोय नारायण सुवेदीले सवारी साधनको नियमन, यात्रुहरु र सवारी साधनको सुरक्षाका लागि नियमित चेकजाँच लगायतका विषयहरुमा प्रहरी प्रशासनले ध्यान केन्द्रीत गर्नुका साथै राजस्व संकलनमा पनि महत्वपूर्ण योगदान दिने गरेको बताए ।
नेपाल उद्योग वाणिज्य संघ मधेश प्रदेशका अध्यक्ष अशोक टेमानीले नेपाल जस्तो भौगोलिक विविधता रहेको देशमा यातायात सुविधाको एक मात्र विकल्प र नागरिकको सहज पहुँचमा रहेको सवारी साधनको अझ व्यवस्थित गर्दै सुविधायुक्त बनाउनुपर्नेमा जोड दिए ।
उनले नेपालमा हालै आयोजना गरिएको नाडा अटोमोबाईल्स प्रदर्शनीले राष्ट्रिय र अन्तराष्ट्रियस्तरमै चर्चामा आएको बताए । वीरगञ्ज उद्योग वाणिज्य संघका अध्यक्ष हरी गौतमले पहिले नेपालमा यातायातका साधनहरु नहुँदा र सडक पूर्वाधारहरु नहुँदा नेपालीहरुले निकै कष्ट र दुख भोगेको स्मरण गर्दै अहिले सवारी साधनहरुको आयात र सडक पूर्वाधारको विकासले धेरै सहज भएको बताए ।
कार्यक्रममा उत्कृष्ट कार्य गर्ने तीन ट्राफिक प्रहरीलाई नगदसहित सम्मान पनि गरिएको थियो। सम्मानित हुनेहरूमा जिल्ला ट्राफिक प्रहरी कार्यालय, महोत्तरी बर्दिवासका प्रहरी सहायक निरीक्षक अजित भण्डारी, जिल्ला ट्राफिक प्रहरी कार्यालय धनुषाका हवलदार रामबाबु साह र राजमार्ग सुरक्षा तथा ट्राफिक व्यावस्थापन कार्यालय पथलैयाकी प्रहरी जवान हस्तकुमारी बि.क. रहेका छन् ।
उदघाटनसत्र निवर्तमान अध्यक्ष केदार अग्रवालको अध्यक्षतमा सुरु भएको थियो । उनले स्वागत मन्तव्यपनि व्यक्त गरेका थिए । सपथ ग्रहणपछि नवनिर्वाचित अध्यक्ष राहुल अग्रवालको अध्यक्षतामा सम्पन्न भएको थियो।
