वीरगन्ज । नेकपा एमालेमा पूर्व राष्ट्रपति विद्या भण्डारीलाई निषेध गरिएपनि उनको पक्षमा नेता कार्यकर्ताहरु भने निरन्तर लागि रहेका छन् । पूर्व राष्ट्रपति भण्डार पार्टी राजनीतिमा पुनः फर्किएपछि नेकपा एमाले भित्र निकै तरंग पैदा भएको छ ।
पार्टीले पूर्व उपाध्यक्ष समेत रहेकी भण्डारीको कुनै पनि कार्यक्रममा नेता कार्यकर्ताहरुलाई उपस्थित हुन रोक लगाएको छ । पार्टीको कुनैपनि तहको कार्यक्रममा पूर्व राष्ट्रपति भण्डारीलाई सहभागी नगराउन कडा निर्देशन नै जारी गरेको छ ।
तर, वामपन्थी नेता तथा एमालेका तत्कालिन महासचिव मदन भण्डारीको श्रीमती विद्यादेवी भण्डारी एमालेको नेतृत्वका लागि र कम्युनिष्ट पार्टीका लागि आवश्यक रहेको भन्दै अहिले उनलाई पार्टी नेतृत्वमा ल्याउन प्रयास र कसरत भईरहेको छ ।
उनलाई नेकपा एमालेका बरिष्ठ उपाध्यक्ष इश्वर पोखरेल, उपाध्यक्ष युवराज ज्ञवाली, अष्टलक्ष्मी शाक्य लगायतका नेताहरुले पनि साथ दिईरहेका छन् । उनलाई पार्टीको कुनैपनि कार्यक्रममा सहभागी नगराउने भएपनि पूर्वराष्ट्रपतिको हैसियतमा उनी विभिन्न कार्यक्रममा देशदौडाहमा रहेकी छिन् । पूर्वराष्ट्रपति भण्डारी शनिबार वीरगन्जमा पनि आउने भएकी छिन् ।
उनी वीरगन्ज आउने भएपछि नेकपा एमालेका नेता कार्यकर्ताहरुले चासो राखेपनि पार्टीले भने उनी सहभागी हुने कार्यक्रममा कोहीपनि नजाओस भन्ने उद्देश्यले कुनैपनि कार्यक्रम नरहेको सामाजिक सञ्जालमा राखेको छ । नेकपा एमाले पर्साका सचिव महेस दासले फेसबुकमा पार्टीको कुनैपनि कार्यक्रम नरहेको जनाएका छन् ।
पार्टीको पेजमा लेखिएको उनले शेयर गरेका छन्, ‘विभिन्न पालिकाबाट कमरेडहरुले भदौ १४ गते पार्टीको के कार्यक्रम सोधीरहनु भएको ले १४ गते नेकपा एमाले पर्साले कुनै कार्यक्रमको आयोजना नगरेको प्रष्ट पार्न चाहन्छौ ।
महेश दास सचिव जिल्ला कमिटी पर्सा ।’ यद्यपि नेकपा एमालेका पोलिब्यूरो सदस्य तथा पूर्वमन्त्री पुरुषोत्तम पौडेलले भने नेकपा एमालेले ‘गणतन्त्रको गौरव’ को रूपमा सम्मानित गरेको व्यक्तित्वलाई पूर्व राष्ट्रपति विद्यादेवी भण्डारीलाई स्वागत गर्नु पार्टीका सबैको कर्तव्य भएको बताएका छन् ।
उनले सामाजिक सञ्जाल फेसबुकमा लेखेका छन्, ‘सम्माननिय विद्यादेवी भण्डारी नेपाली राजनीतिको एकजना सम्मानित नाम हो । नेकपा एमालेको केन्द्रीय नेतृत्वमा हुदा होस या सरकारमा हुदा, दुई पटक उपाध्यक्ष हुदा या देशको राष्ट्रपतिको रूपमा अत्यन्त गरिमामय ढंगले कुशलता पूर्वक आफ्नो कर्तव्य निर्वाह गर्नु भएको छ । नेपालमा समावेशिता र महिला सहभागिताको लागी वहाले इतिहासमै सम्मान योग्य भूमिका निर्वाह गर्नु भएको छ ।’ यसर्थ भोली विरगंजमा हुने महिला उद्यमी सम्मान कार्यक्रमका लागी आउदै हुनुहुन्छ । वारा जिल्लाको सिमरामा सम्माननिय पूर्व राष्ट्रपतिलाई स्वागत तथा सम्मान गर्नु हामी सवैको कर्तव्य हो ।’
भण्डारीलाई स्वागत गर्न नेकपा एमालेका केन्द्रीयदेखि जिल्ला र महानगरका नेता कार्यकर्ताहरुपनि सिमरा स्थित विमानस्थलमा जाने तयारी गरेको बुझिएको छ । विद्यादेवी भण्डारीको विषयमा मात्रै होईन नेकपा एमाले पर्सामा जनवादी केन्द्रीयता प्रतिकूल गुट उपगुट चलाईरहेको पार्टीका शुभचिन्तकहरुले बताएका छन् ।
