वीरगन्ज । बाघको आक्रमणमा परी एक जनाको मृत्यु भएको छ । मृत्यु हुनेमा जितपुरसिमरा उपमहानगरपालिका–२२ निवासी ५५ वर्षीय कृष्ण प्रसाद शर्मा रहेको जिल्ला प्रहरी कार्यालय बाराले जनाएको छ ।
प्रहरीका अनुसार शर्मा बुधबार बिहान करिब ७स्३० बजेतिर स्कुटरमा घाँस काट्न आधाभार जंगलतर्फ गएका थिए । उनी घर नफर्किएपछि आफन्तले खोजतलास सुरु गरेका थिए । खोजतलासका क्रममा जंगलभित्र उनको स्कुटी र काटेको घाँस मात्र भेटिए पनि उनी फेला नपरेपछि आफन्तले प्रहरीलाई खबर गरेका थिए ।
प्रहरी र स्थानीयले संयुक्त रूपमा खोजी गर्ने क्रममा जंगलभित्र चप्पल र रगतको दाग भेटिएको थियो । त्यसपछि दिउँसो प्रहरी टोलीसँगै आधाभार ब्यारेकबाट खटिएको नेपाली सेनाले थप खोजतलास गर्दा जंगलभित्र शर्मा मृत अवस्थामा फेला परेको प्रवक्ता एवम् प्रहरी नायब उपरीक्षक (डीएसपी) विजयराज पण्डितले जानकारी दिएका छन् ।
उनका अनुसार शवको टाउको नभएको र बाघले आक्रमण गरेको अवस्थामा भेटिएको छ । प्रारम्भिक अनुसन्धानले उनलाई घाँस काट्ने क्रममा बाघले आक्रमण गरेको देखाएको प्रहरीले जनाएको छ ।
यस घटनापछि स्थानीयवासी त्रसित बनेका छन् । आधाभार क्षेत्र नजिकै बाघ देखिन थालेपछि यसअघि पनि पटक–पटक जनताले सुरक्षाको माग गर्दै आएका थिए । तर, आवश्यक कदम नचालिएको भन्दै उनीहरूले गुनासो गरेका छन् ।
स्थानीयले जंगल क्षेत्रमा नियमित वन्यजन्तु नियन्त्रण तथा जनचेतना कार्यक्रम गर्न माग गर्दै मृतकलाई उचित क्षतिपूर्ति उपलब्ध गराउन सरकारसँग आग्रह गरेका छन् । शवलाई पोस्टमार्टमका लागि कलैया अस्पताल ल्याइएको प्रहरीले जनाएको छ ।
