काठमाडौँ । संघीय मामिला तथा सामान्य प्रशासनमन्त्रीबाट राजीनामा दिएका राजकुमार गुप्तामाथि भ्रष्टाचार मुद्दा चल्ने भएको छ । ७८ लाख घुस डिलसम्बन्धी सार्वजनिक भएको अडियो उनकै भएको पुष्टि भएपछि अख्तियार दुरुपयोग अनुसन्धान आयोगले उनीविरुद्ध मुद्दा चलाउने तयारी गरेको हो ।
अख्तियार स्रोतका अनुसार गुप्ताको अडियोको प्राविधिक परीक्षणमा आवाज उनकै रहेको प्रमाणित भएको छ । अडियोमा एक व्यक्तिसँगको कुराकानीमा गुप्ताले ७८ लाख रुपैयाँ घुस लिनेबारे कुरा गरेको सुनिन्छ । यसैलाई आधार मानेर अख्तियारले उनीविरुद्ध छानबिन अगाडि बढाएको थियो ।
प्रमाण जुटेपछि अख्तियारले गुप्तालाई बयानका लागि बोलाएको छ । घुस डिलको अडियो नै भ्रष्टाचारको मुद्दा दायर गर्न पर्याप्त हुने भएकाले आयोगले थप प्रमाणहरू संकलन गरिरहेको छ । यदि उनीविरुद्ध भ्रष्टाचार मुद्दा दायर भए, यो नेपालको राजनीतिमा अर्को ठूलो भ्रष्टाचार प्रकरण हुनेछ ।
घुस डिलको अडियो सार्वजनिक भएपछि गुप्ताले मन्त्री पदबाट राजिनामा दिएका थिए । उनले राजिनामा दिने बेलामा सूचना प्रविधिमा भएको विकासले आफू शिकार भएको र अरुलाई यस्तो शिकार हनु नपरोस भन्ने वक्तव्य दिएका थिए ।
