वीरगन्ज । वीरगन्जमा हैजाको संक्रमण फैलिएको आशंकापछि स्वास्थ्य तथा जनसंख्या मन्त्री प्रदीप पौडेलले प्रभावित क्षेत्रको निरीक्षण गरेका छन् । उनले वीरगन्जको नारायणी अस्पताल र तराई अस्पतालको अनुगमन गरी बिरामीहरूको उपचार र प्रयोगशाला परीक्षण निःशुल्क गर्न निर्देशन दिएका छन् ।
हालै वीरगन्ज महानगरपालिकाको वडा नम्बर १२ मा झाडापखाला र वान्ताका बिरामीहरूको संख्या बढेपछि हैजाको प्रकोप फैलिएको आशंका गरिएको थियो। केही बिरामीको परीक्षणमा हैजा पुष्टि भए पनि सरकारले औपचारिक रूपमा प्रकोप घोषणा गरिसकेको छैन।
मन्त्री पौडेलले स्थानीय सरकार र अस्पतालहरूसँगको छलफलमा बिरामीको उपचारमा कुनै अभाव हुन नदिने प्रतिबद्धता व्यक्त गरे। उनले हैजा हो वा होइन भन्ने पत्ता लगाउन विज्ञहरूको टोली खटिएको र चाँडै रिपोर्ट आउने विश्वास व्यक्त गरे । साथै, उनले सञ्चारमाध्यमहरूलाई गलत र अफवाह फैलाउने खालका समाचार प्रकाशन नगर्न आग्रह गरे ।
जिल्ला जनस्वास्थ्य कार्यालय, पर्साका अनुसार, हालसम्म २५४ जना झाडापखालाका बिरामीमध्ये ७९ जनामा हैजा संक्रमण पुष्टि भएको छ। हाल १०३ जना बिरामी विभिन्न अस्पतालमा उपचाररत छन्।
वीरगन्ज महानगरपालिकाका मेयर राजेशमान सिंहले प्रकोप नियन्त्रणका लागि निजी अस्पतालहरूसँग सहकार्य गरेर थप १,४२५ बेड तयारी अवस्थामा राखिएको जानकारी दिए । यसमा नेसनल मेडिकल कलेज, तराई अस्पताल, वीरगन्ज हेल्थकेयर लगायतका अस्पतालहरू पर्छन्।
