वीरगन्ज । वीरगन्जमा गएको शुक्रबारदेखि फैलिएको हैजाको प्रकोप नियन्त्रणका लागि स्वस्थ्य संकट व्यावस्थापन समितिले विभिन्न निर्णयहरु गरेको छ । मधेश प्रदेश सरकारका स्वास्थ्य तथा जनसङ्ख्या मन्त्रालयले स्वास्थ्य संकट व्यवस्थापन समितिको निर्णयहरु सार्वजनिक गरेको हो।
स्वास्थ्य तथा जनसंख्या मन्त्री सत्रुधन प्रसाद सिंहको विशेष उपस्थितिमा एवं पर्साका निमित्त प्रमुख जिल्ला अधिकारी सुमन कुमार कार्कीको संयोजकत्वमा आईतबार बसेको बैठकले झाडापखाला र हैजा जस्ता रोगहरुको रोकथाम र नियन्त्रणका लागि विभिन्न महत्वपूर्ण निर्णयहरु गरेको हो ।
निर्णय अनुसार सुरक्षा निकाय, स्थानीय तह, राजनीतिक दल, पेशागत संघसंस्था, नेपाल रेडक्रस सोसाईटी, गैर सरकारी संस्था, मिडिया र विभिन्न दातृ संस्थाहरुको समन्वयमा माईकिङ्ग, घरदैलो तथा सचेतना जागरण अभियानहरु सञ्चालन गरिनेछ।
महामारीको समयमा स्वास्थ्य जनशक्तिको अभाव हुन नदिन अत्यावश्यकबाहेक बिदा स्वीकृत नगरिने र आवश्यकताअनुसार जिल्लास्थित स्थानीय तहका स्वास्थ्यकर्मीलाई तोकिएको स्वास्थ्य संस्थामा खटाइने निर्णय पनि गरिएको छ।
साथै, औषधि, किट र खानेपानी निर्मलीकरणका लागि आवश्यक औषधिको पर्याप्तता सुनिश्चित गर्न प्रदेश सरकार र नेपाल सरकार, स्वास्थ्य तथा जनसंख्या मन्त्रालयसँग अनुरोध गर्ने निर्णय भएको छ।
यसका अतिरिक्त, महामारी नियन्त्रणका लागि एकीकृत परिचालन केन्द्र स्थापना गरी फोकल पर्सन समेत तोकिने र नेपाल सरकार तथा प्रदेश सरकारबाट प्राप्त थप जनशक्ति तथा स्रोत साधनलाई व्यवस्थित रुपमा वितरण र अनुगमन गरिनेछ।
महामारीको स्रोत पत्ता लगाउन सम्बन्धित स्थानीय तहले अनुसन्धान गर्ने र सोका लागि आवश्यक प्राविधिक सहयोग प्रदेश तथा नेपाल सरकार, स्वास्थ्य तथा जनसंख्या मन्त्रालयले गर्ने निर्णय समेत भएको छ।
