वीरगञ्ज । वीरगञ्जको नारायणी सेन्ट्रल हस्पिटल वीरगञ्ज प्रा.लि.मा पित्तथैलीको पत्थरीको शल्यक्रिया गर्दा लापरबाही भएको आरोप लागेको घटनामा पीडित बिरामी सन्तोष लालकर्ण र अस्पताल प्रशासनबीच सहमति भएको छ।
जिल्ला प्रशासन कार्यालय पर्साको रोहबरमा अस्पतालले पीडित कर्णलाई नगद तीन लाख रुपैयाँ दिने गरी सहमति जुटेको हो।
गत असार २ गते ४५ वर्षीय सन्तोषलाल कर्णले नारायणी सेन्ट्रल हस्पिटलमा पित्तथैलीको पत्थरीको शल्यक्रिया गराएका थिए। शल्यक्रियाको क्रममा चिकित्सक डा.नितेशकुमार कर्णले नकाट्नुपर्ने नसा काटेको भन्दै पीडितले साउन २० गते जिल्ला प्रशासन कार्यालय पर्सामा उजुरी दर्ता गराएका थिए।
पर्साका प्रमुख जिल्ला अधिकारी (प्रजिअ) गणेश अर्याल, सहायक प्रजिअ सुमनकुमार कार्की र जिल्ला प्रशासनको उजुरी शाखाका नायब सुब्बा गौरीशंकर गुप्ताको उपस्थितिमा भएको छलफलपछि सहमति भएको हो।
अस्पताल प्रशासनले बिहीबार जिल्ला प्रशासन कार्यालयमै नगद तीन लाख रुपैयाँ पीडित कर्णलाई हस्तान्तरण गरेर यो विवाद टुंग्याएको छ।
