५ भदौ, काठमाडौं । काभ्रेपलाञ्चोकको धुलिखेल नगरपालिका–८ तिरतिरे धारामा बिहीबार (भदौ ५) बिहान पहिरो खस्दा अरनिको राजमार्ग पूर्ण रूपमा अवरुद्ध भएको छ। बिहान करिब ९ः४० बजे सडकमाथिबाट अचानक सुक्खा पहिरो खस्दा राजमार्ग बन्द हुँदा दुईतर्फी सवारी आवागमन ठप्प भएको प्रहरीले जनाएको छ।
राजमार्ग अवरुद्ध भएपछि काठमाडौंसहित पूर्वी पहाडी जिल्लातर्फ जाने सवारी साधन बाटैमा रोकिएका छन्। यात्रुहरूलाई असुविधा भएको छ भने लामो दूरीका यातायात सेवामा समेत असर परेको छ।
प्रहरीका अनुसार, पहिरो हटाएर सडक सञ्चालनमा ल्याउने कार्य भइरहेको छ। डोजर परिचालन गरेर सडक सफा गर्ने तयारी भइरहेको र मौसम सामान्य रहे चाँडै नै सडक खुल्ने अपेक्षा गरिएको छ।
स्थानीयवासीले समेत बाटो खुलाउन सहयोग गरिरहेका छन्। बारम्बार पहिरो खस्ने जोखिमयुक्त क्षेत्रमा यात्रुहरूलाई सावधानी अपनाउन र अनावश्यक यात्रा नगर्न प्रहरीले आग्रह गरेको छ।
छ।
