वीरगन्ज । पर्सा र बारा सहित २६ जिल्लाका प्रमुख जिल्ला अधिकारीहरुको सरुवा भएको छ । बुधबार गृह मन्त्रालयले एकैपटक २६ जिल्लाका प्रमुख जिल्ला अधिकारी (सिडिओ) हरूको सरुवा गरेको हो।
पर्साका प्रमुख जिल्ला अधिकारी गणेश अर्यालको गृहमन्त्रालयमा सरुवा भएको छ । त्यस्तै बाराका प्रमुख जिल्ला अधिकारी बषन्त अधिकारीको सिरहा जिल्लामा सरुवा भएको छ । गणेश अर्यालको ठाउँमा पर्सामा तोय नारायण सुवेदी र बारामा अधिकारीको ठाउँमा प्रकाश पौडेललाई खटाइएको छ।
मन्त्रालयले १९ सहसचिव र २४ उपसचिव गरी कुल ४३ जनाको सरुवा गरेको छ । यो सरुवाअनुसार, काठमाडौंमा सहसचिव छवि रिजाललाई नयाँ सिडिओको रूपमा खटाइएको छ भने यसअघि काठमाडौंमा कार्यरत ऋषिराम तिवारीलाई मन्त्रालयमा तानिएको छ।
यसैगरी, ललितपुरमा सुमन घिमिरे, भक्तपुरमा नमराज घिमिरे, अन्य सरुवा हुने सिडिओहरूमा दोलखामा भोला दाहाल, भोजपुरमा बाबुराम गौतम, संखुवासभामा सृजना थपलिया, पाल्पामा बिनु बज्राचार्य कुँवर,
सप्तरीमा टुवराज पोखरेल, धनकुटामा शिवराज गेलाल, ओखलढुंगामा मेखबहादुर मंग्राति, दाङमा विश्वप्रकाश अर्याल र धादिङमा विजयराज सुवेदी रहेका छन्। यस सरुवामा उपसचिव सिडिओ हुने १२ जिल्लाका प्रमुखहरू पनि हेरफेर गरिएको छ।
