वीरगञ्ज । प्रहरीले मानव बेचबिखन तथा ओसारपसारको आरोपमा एक जना महिलालाई पर्साबाट पक्राउ गरेको छ। पक्राउ पर्नेमा गोरखा नगरपालिका वडा नं। ४ की २८ वर्षीया सरिता सिर्मल रहेकी छिन्।
प्रहरीले कास्की, झापा, काठमाण्डौ, धादिङ, चितवन, बाग्लुङ र मकवानपुर लगायतका जिल्लाहरूबाट महिला तथा बालिकाहरूलाई विभिन्न प्रलोभनमा पारेर बेचबिखन गर्ने गरेको विशेष सूचनाको आधारमा अनुसन्धान सुरु गरेको थियो।
जिल्ला प्रहरी कार्यालय पर्सा र प्रहरी चौकी इनर्वाको संयुक्त टोलीले वीरगञ्ज महानगरपालिका वडा नं। १६ स्थित शंकराचार्य गेटबाट सिर्मललाई पक्राउ गरेको जिल्ला प्रहरी कार्यालय पर्साका प्रपक्ता प्रहरी नायव उपरीक्षक किशोर लम्सालले जानकारी दिए ।
सिर्मलले हेटौडाबाट गाडीमा ल्याइएका तीन जना महिलाहरूलाई वीरगञ्ज हुँदै भारतको रक्सौलतर्फ लैजाने क्रममा प्रहरीले उनीहरूलाई उद्धार गरेको थियो।
प्रहरीका अनुसार, सिर्मलले राम्रो काम, नयाँ कपडा, विवाह र पैसाको प्रलोभन देखाएर महिलाहरूलाई फकाएर बेचबिखन गर्ने प्रयास गरेकी थिइन्।
पक्राउ परेकी सिर्मललाई मानव बेचबिखन तथा ओसारपसारसम्बन्धी कसूरमा पर्सा जिल्ला अदालतबाट ५ दिनको म्याद थप गरी थप अनुसन्धान भइरहेको प्रहरीले जनाएको छ।
