रञ्जित पाण्डेय
वीरगन्ज । अखिल नेपाल यातायात मजदुर संघको प्रदेश कमिटी विस्तारित बैठक बुधबार बाराको अमलेखगञ्जमा सम्पन्न भएको छ। संघका प्रदेश अध्यक्ष कमरेड रङ्गनाथ तिमल्सिनाको अध्यक्षतामा भएको यस बैठकमा संगठन सुदृढीकरण, सामाजिक सुरक्षा कार्यान्वयन, र यातायात पेसालाई मर्यादित बनाउने विषयमा गम्भीर छलफल भएको छ।
बैठकमा बारा जिल्ला इन्चार्ज क्षेत्रबहादुर श्रेष्ठ ‘अनिल’ विशिष्ट अतिथिका रूपमा सहभागी थिए भने केन्द्रीय अध्यक्ष दिपक केसीले प्रशिक्षण दिएका थिए। केसीले यातायात मजदुरहरूको हकहित र पेसागत मर्यादाका लागि संगठनको भूमिका महत्त्वपूर्ण हुने बताएका थिए।
उनले हरेक वडा र पालिकामा कमिटी गठन गरी संगठनको संरचनालाई थप बलियो बनाउनुपर्नेमा जोड दिए। “यातायात मजदुरहरूको पेसालाई सम्मानित र मर्यादित बनाउन हामी सबै एकजुट भएर लाग्नुपर्छ। सामाजिक सुरक्षाको कार्यान्वयनले मजदुरहरूको जीवनस्तर सुधार हुनेछ,” केसीले भने।
बैठकमा विभिन्न जिल्ला कमिटीहरूले आफ्ना गतिविधि र प्रगति विवरण प्रस्तुत गरेका थिए। बैठकमा मजदुरहरूको न्यून ज्याला, असुरक्षित कार्यस्थल, र सामाजिक सुरक्षाको अभावजस्ता समस्याहरूमाथि छलफल भएको थियो। यसका साथै, मजदुरहरूको पेसालाई व्यवस्थित र मर्यादित बनाउन नीतिगत सुधार र संगठनात्मक रणनीतिका बारेमा पनि निर्णयहरू लिइएको छ।
