वीरगन्ज । महालेखा परीक्षकको कार्यालयले श्रावण महिनाको चौथो सातादेखि पहिलो चरणमा लेखा परीक्षण शुरु गर्ने भएको छ । कार्यालयका उप–महालेखापरीक्षक विन्दु बिष्टले महालेखापरीक्षकको कार्यालयको वार्षिक लेखापरीक्षण योजना अन्तर्गत पहिलो चरणमा ४२ जिल्लाहरूमा लेखापरीक्षण गर्ने घोषणा गरेका छन् । यो लेखापरीक्षण २०८२ श्रावणको चौथो सातादेखि आधिन महिनासम्म हुनेछ।
यस लेखापरीक्षण टोलीले हिमाली, पहाडी र तराईका गरी ४२ जिल्लाका सरकारी कार्यालयहरूको आर्थिक कारोबारको स्थलगत परीक्षण गर्नेछ। यसमा आर्थिक वर्ष २०८१/८२ को कारोबार र यदि कुनै बक्यौता छ भने त्यसको पनि लेखापरीक्षण गरिनेछ।
महालेखापरीक्षकको कार्यालयले लेखापरीक्षणको क्रममा सार्वजनिक सहभागिता र सहयोगको लागि अनुरोध गरेको छ। कुनै पनि व्यक्तिसँग लेखापरीक्षणमा सहयोग पुग्ने सूचना, जानकारी, विवरण, प्रमाण वा गुनासो भएमा लेखापरीक्षण टोलीलाई उपलब्ध गराइदिन भनिएको छ।
कार्यालयले लेखापरीक्षणमा स्वतन्त्रता, निष्पक्षता र वस्तुपरकता कायम राख्दै गुणस्तर सुधार गर्न निरन्तरता दिएको जानकारी गराएको छ। यदि कसैलाई सरकारी कार्यालयको आर्थिक काम कारवाही वा लेखापरीक्षण टोलीको कार्य सन्दर्भमा कुनै सुझाव वा गुनासो भएमा महालेखापरीक्षकको कार्यालयको टोल फ्री नम्बर १८१०५००००६१ मा कल गर्न वा gunaso@oagnep.gov.np मा इमेल गर्न आग्रह गरिएको छ।
यस चरणमा लेखापरीक्षण हुने जिल्लाहरूमा ताप्लेजुङ, रामेछाप, म्याग्दी, मुगु लगायत ४२ जिल्लाहरू सामेल छन्। उपत्यका बाहिरका आन्तरिक राजस्व र भन्सारतर्फका कार्यालयहरूको पनि लेखापरीक्षण हुनेछ।
