वीरगन्ज । चालू आर्थिक बर्षको साउनदेखि वीरगञ्ज (एकीकृत भन्सार जाँच चौकी) आईसीपी र सुक्खा बन्दरगाह भन्सार कार्यालय (आईसीडी) गाभिएर एउटै प्रशासनिक संरचना बनेपछि भन्सार राजस्व संकलनमा सुधार देखिएको छ ।
चालू आर्थिक वर्षको पहिलो महिना अर्थात् साउनमा कार्यालयले १८ अर्ब ३९ करोड ६७ लाख रुपैयाँ राजस्व सङ्कलन गर्न सफल भएको छ । भन्सार विभागले निर्धारण गरेको २० अर्ब ९८ करोड २१ लाख रुपैयाँको मासिक लक्ष्यको यो ८७.६८ प्रतिशत हो ।
गत वर्षको साउन महिनामा १५ अर्ब ९२ करोड रुपैयाँ मात्र राजस्व सङ्कलन भएको थियो । गतबर्षको तुलनामा यस वर्षको साउन महिनाको भन्सार राजस्व सङ्कलनमा उल्लेखनीय वृद्धि देखिएको छ । भन्सार विभागले दिएको यस वर्षको वार्षिक लक्ष्य २ खर्ब ७३ अर्ब ३९ करोड ४८ लाख रुपैयाँ रहेको छ ।
पहिलो महिनाको राजस्व संकलनले यो लक्ष्य प्राप्त गर्न सक्ने आशा जगाएको छ । प्रमुख भन्सार प्रशासक दीपक लामिछानेका अनुसार चालू आर्थिक बर्षको एक महिनाको राजस्व संकलनले अर्थतन्त्र चलायमान भएको संकेत देखिएको छ ।
उनले भने, ‘राजस्व संकलनको हिसाबले अर्थतन्त्र चलायमान भएको संकेत गरेको छ । साउन महिना यसैपनि कम राजस्व उठ्ने महिना हो । इन्धनको खपत पनि कम हुने, आयात पनि कम हुने र भन्सार राजस्वमा योगदान दिने मुख्य वस्तु इन्धन आयातमा कमी हुँदा हुँदै पनि ८७.६८ प्रतिशत राजस्व संकलन हुनु सकारात्मक हो ।’
पहिलो महिनामा देखिएको राजस्व संकलनको सुधारले मात्रै एबर्षभरीको राजस्व संकलनमा सुधार ल्याउछ भनेर भन्न नसकिने प्रशासक लामिछानेको भनाई छ । उनले भने, ‘राजस्व संकलन मात्रै एकीकृत भएको हो । सेवा जहाँ थियो त्यहिबाट भईरहेको छ ।’
वीरगन्ज भन्सार कार्यालयको तथ्यांकमा चालू आर्थिक बर्षको पहिलो महिना साउनमा मोटरसाईकल आयातले राजस्व संकलनमा दोस्रो नम्बरमा योगदान दिएको छ । साउन महिनामा इन्धनको आयात कम भएपनि राजस्वमा योगदान भने इन्धनको पेट्रोलले दिएको छ ।
