जनकपुरधाम । नेपाल बार एशोसिएशन, जनकपुरधाम र नेपाल पत्रकार महासंघ, मधेश प्रदेशबीच लामो समयदेखि चल्दै आएको जग्गा विवाद अन्ततः टुंगिएको छ। दुवै संस्थाबीच एक ऐतिहासिक सम्झौतामा हस्ताक्षर भएसँगै विवादले नयाँ मोड लिएको हो।
बुधबार एक संयुक्त प्रेस विज्ञप्ति जारी गर्दै दुवै पक्षले विवादित जग्गाको उपयोग आपसी सहमतिमा गर्ने बताएका छन्। विज्ञप्ति अनुसार, गुठी संस्थानबाट लिजमा लिइएको जग्गाको केही भाग नेपाल बार एशोसिएशनले पार्किङका लागि र बाँकी भाग नेपाल पत्रकार महासंघले आफ्नो बहुउद्देश्यीय कामका लागि प्रयोग गर्नेछ।
यो सहमतिले दुई जिम्मेवार व्यावसायिक संस्थाहरूबीचको सम्बन्धमा नयाँ अध्यायको सुरुवात भएको जनाइएको छ। यसबाट भविष्यमा लोकतन्त्र, कानुनी शासन र अभिव्यक्ति स्वतन्त्रताको सुदृढीकरणका लागि मिलेर काम गर्ने प्रतिबद्धता पनि व्यक्त गरिएको छ।
विवादका क्रममा भएका घटनाहरूप्रति दुवै पक्षले दुःख व्यक्त गरेका छन् भने घाइतेहरूको शीघ्र स्वास्थ्यलाभको कामना गरेका छन्।साथै, सामाजिक सञ्जालमा एक-अर्काविरुद्ध आलोचनात्मक सामग्री पोस्ट नगर्ने प्रतिबद्धता पनि उनीहरूले व्यक्त गरेका छन्।
समझदारी अनुसार, दुई दिनभित्र एकअर्काविरुद्धका सबै कानुनी कारबाही फिर्ता लिइने वा निष्क्रिय बनाइने बताइएको छ। यो सहमतिले कुनै पनि विवादलाई संवादको माध्यमबाट समाधान गर्न सकिन्छ भन्ने उत्कृष्ट उदाहरण प्रस्तुत गरेको छ।
यो ऐतिहासिक सम्झौतालाई सफल बनाउन दुवै संस्थाद्वारा गठित उच्चस्तरीय वार्ता समितिको भूमिका महत्त्वपूर्ण रह्यो। नेपाल बार एशोसिएशनको तर्फबाट अधिवक्ता बाबुराम अर्यालको संयोजकत्वमा वरिष्ठ अधिवक्ता चन्द्रकुमार शर्मा मैनाली र श्याम कुमार मिश्र सदस्य थिए भने नेपाल पत्रकार महासंघको तर्फबाट के.सी. लामिछानेको संयोजकत्वमा केन्द्रीय सदस्य राजेश कुमार कर्ण र राजु विश्वकर्मा सदस्य रहेका थिए।
विज्ञप्तिमा नेपाल पत्रकार महासंघ, मधेश प्रदेशका अध्यक्ष श्यामप्रसाद बन्जारा र नेपाल बार एशोसिएशन, जनकपुरधामका अध्यक्ष अधिवक्ता विमलकुमार मिश्रले हस्ताक्षर गरेका छन्।
