रंजीत पाण्डेय
बारा । जिल्ला प्रहरी कार्यालय, बाराले विशेष सूचनाका आधारमा छापा मार्दै लागू औषध ब्राउन सुगर सहित एक महिलालाई नियन्त्रणमा लिएको छ।
घरमै बसेर लागू औषध बिक्री वितरण गरिरहेको भन्ने गोप्य सूचना प्राप्त भएपछि खटिएको इलाका प्रहरी कार्यालय बाराको टोलीले मंगलबार दिउँसो करिब २ः ५० बजेको समयमा फेटा गाउँपालिका–१, त्रिवेणीटोल बस्ने वर्ष ४० की पार्वती महतोलाई नियन्त्रणमा लिएको हो ।
प्रहरी नायब निरीक्षक रामकिशुन यादवको कमाण्डमा खटिएको प्रहरी टोलीले महतोको घर खानतलासी गर्दा कपडाको झोलामा राखिएको प्लास्टिकको सानो बट्टा फेला परेको थियो। उक्त बट्टा भित्र प्लास्टिकका साना–साना पुरियामा प्याक गरी लुकाइएको अवस्थामा लागू औषध ब्राउन सुगर जस्तो देखिने १० ग्राम १६० मिलिग्राम पदार्थ बरामद गरिएको प्रहरीले जनाएको छ।
बरामद गरिएको पदार्थलाई परीक्षणका लागि आवश्यक प्रक्रिया अघि बढाइएको र प्रारम्भिक जाँचमा ब्राउन सुगर हुन सक्ने देखिएको प्रहरीले जानकारी दिएको छ। साथै, पक्राउ परेकी महतोसहितको घटनाबारे थप अनुसन्धान भइरहेको जिल्ला प्रहरी कार्यालय बाराले जनाएको छ।
यस घटनासम्बन्धमा आवश्यक कानूनी कारबाही अघि बढाइएको र संलग्न अन्य व्यक्तिहरूको समेत संलग्नता बारेमा अनुसन्धान भइरहेको प्रहरीले जनाएको छ। साथै, प्रहरीले लागूपदार्थको दुष्परिणामबारे सचेत रहन सम्पूर्ण नागरिकलाई आग्रह गर्दै लागू औषध नियन्त्रण अभियानलाई अझ कडाइका साथ अघि बढाइने जनाएको छ।
