वीरगन्ज । खाद्य प्रविधि तथा गुण नियन्त्रण डिभिजनको नेतृत्वमा रहेको वीरगन्जका तीनवटा मिठाई पसललाई नगद जरिवाना गराएको छ । सरसफाइको अवस्था सन्तोषजनक नभेटिएपछि वीरगन्जका तीन मिठाई पसललाई जनही रु. २० हजारका दरले जरिवाना गरिएको हो ।
सोमबार खाद्य प्रविधि तथा गुण नियन्त्रण डिभिजन कार्यालय, पर्सा जिल्ला प्रशासन कार्यालय, वीरगन्ज वाणिज्य कार्यालय, जिल्ला प्रहरी कार्यालय, वीरगन्ज र उद्योग वाणिज्य संघ समेतको संयुक्त टोलीले वीरगन्जका विभिन्न होटल तथा मिठाई पसलहरूको अनुगमन गरेको थियो।
अनुगमनका क्रममा मिठाई बनाउने स्थलको सरसफाइ सन्तोषजनक नपाएपछि वीरगन्ज महानगरपालिका वडा नम्बर १६ इनर्वामा रहेको माँ वैष्णवी मिष्ठान्न भण्डार, नगवामा रहेको जय हिमालय स्वीट्स र बसपार्क नजिकै रहेको मनोकामना स्वीट्स गरी तीन मिठाई पसललाई तत्काल २० हजार रुपैयाँ जरिवाना गरिएको हो।
टोलीले सात दिनभित्र मिठाई बनाउने स्थलको सम्पूर्ण सरसफाइ व्यवस्थापन गरी खाद्य स्वच्छता कायम गर्नसमेत निर्देशन दिएको छ। यदि तोकिएको समयभित्र निर्देशन पालना नगरे थप कारबाही गरिने चेतावनी समेत दिइएको छ।
खाद्य वस्तुमा स्वच्छता कायम गराउन यस्ता अनुगमनलाई निरन्तरता दिइने खाद्य प्रविधि तथा गुण नियन्त्रण डिभिजन कार्यालय वीरगन्जका सूचना अधिकारी श्रवण कुमार साहले जानकारी दिए ।
जय हिमालय स्वीट्स यस अघि पनि कारवाहीमा परेको मिठाई पसल हो । उसलाई कार्यालयमै बोलाएको र आवश्यक मापदण्डहरु पूरा गरेको छ कि छैन त्यो सबै अनुसन्धान गरेर मुद्दा समेत चलाउने अवस्था भएको सूचना अधिकारी साहले बताए ।
