वीरगन्ज । वीरगन्ज उद्योग वाणिज्य संघले दिवंगत सशस्त्र प्रहरी उपरीक्षक सुमन तिमिल्सिनाको स्मृतिमा स्थापना गरेको ‘बेष्ट इन्टिग्रिटी अवार्ड’ वितरण गरेको छ ।
वीरगन्ज उद्योग वाणिज्य संघले सशस्त्र प्रहरी बल नम्बर १३ गण हेडक्वाटर पर्साका तत्कालिन सशस्त्र प्रहरी उपरीक्षक सुमन तिमिल्सिनाको स्मृतिमा सशस्त्र प्रहरीलाई यसबर्षदेखि ‘बेष्ट इन्टिग्रिटी एवार्ड’ वितरण गर्न थालेको छ । यसबर्षको पहिलो पुरस्कार सशस्त्र प्रहरी नायव उपरीक्षक लोकेन्द्र सुब्बालाई प्रदान गरिएको छ ।
सशस्त्र प्रहरी बल प्रस्तावित सीमा सुरक्षा गुल्म वीरगन्ज भन्सारमा कार्यरत रहँदा छोटो समयमा नै अवैध सामान नियन्त्रणमा महत्वपूर्ण भूमिका खेलेको भन्दै वीरगन्ज उद्योग वाणिज्य संघले स्थापना गरेको २५ हजार राशीको ‘बेष्ट इन्टिग्रिटी अवार्ड’ सशस्त्र प्रहरी नायव उपरीक्षक सुब्बालाई प्रदान गरिएको हो ।
सशस्त्र प्रहरी बल नेपाल नम्बर १३ गण हेडक्वाटर पर्सामा आयोजना गरिएको कार्यक्रममा सशस्त्र बल नेपाल नम्बर २ छिन्नमस्ता बाहिनी महोत्तरीका बाहिनीपति सशस्त्र प्रहरी नायव महानिरीक्षक कृष्ण ढकाल र वीरगन्ज उद्योग वाणिज्य संघका अध्यक्ष हरि गौतमले सम्मान गरे ।
सशस्त्र प्रहरीलाई निजीक्षेत्रबाट बेष्ट इन्टिग्रिटीको सम्मान पाउनु नागरिकले सिंगो सशस्त्र प्रहरी संगठनमाथि नै विश्वास र भरोसा गरेर सम्मान गरेको बताउदै सशस्त्र प्रहरी नायव महानिरीक्षक कृष्ण ढकालले यसले संगठनलाई थप जिम्मेवार बनाएको बताए । उनले पुरस्कृत हुने सशस्त्र प्रहरी नायव उपरीक्षक सुब्बालाई थप उर्जा र इमान्दारिताका साथ काम गर्न निर्देशन पनि दिए ।
वीरगन्ज उद्योग वाणिज्य संघका अध्यक्ष हरि गौतमले राजस्व चुहावट नियन्त्रण र सीमा सुरक्षाका लागि खटिएका सशस्त्र प्रहरी संगठनसँगको सहकार्यले मात्रै देशको उद्योग व्यावसायक्षेत्रमा सुधार आउने धारणा व्यक्त गरे । उनले भने, ‘वीरगन्ज उद्योग वाणिज्य संघ देशमा स्वस्थ र स्वच्छ व्यापार चाहन्छ ।कुनैपनि अवैध व्यापार गर्नेको पक्ष लिदैन, अवैध व्यापार गर्नेलाई पक्राउ गरेमा छोड्नलाई सिफारिस पनि गर्दैन । यसमा सशस्त्र प्रहरीको भूमिका निकै सराहनीय छ ।’
सशस्त्र प्रहरी उपरीक्षक सुमन तिमिल्सिना निजीक्षेत्रमैत्री सशस्त्र प्रहरी अधिकृत भएको र उनको असामयिक निधनले एउटा असल र इमान्दार राष्ट्रसेवक कर्मचारी गुमाउनुपर्दा निकै ठूलो पीडाबोध भएको बताए ।
