रंजीत पाण्डेय
महोत्तरी — अखिल नेपाल महिला संघ (क्रान्तिकारी) मधेश प्रदेशको प्रथम सम्मेलनले १०२ सदस्यीय समिति गठन गरेको छ । शनिबार महोत्तरीको बर्दीबासमा सम्पन्न प्रथम सम्मेलनबाट १०२ सदस्यीय प्रदेश समिति गठन गरेको हो ।
पदाधिकारीहरूको चयन पछि गर्ने निर्णय गर्दै संरचनागत रूपमा समितिलाई विस्तार गर्ने सम्मेलनले निष्कर्ष निकालेको छ। सम्मेलनको उद्घाटन नेकपा (माओवादी केन्द्र) का उपमहासचिव तथा मधेश प्रदेश इन्चार्ज मातृका प्रसाद यादवले गरेका थिए ।
सम्मेलनमा बोल्ने वक्ताहरूले मधेश प्रदेशमा महिलाहरूको समस्यालाई सम्बोधन गर्दै समान अधिकार, शिक्षा र राजनीतिक सहभागितामार्फत सशक्तिकरण गर्नुपर्नेमा जोड दिएका थिए।
उनीहरूले आगामी दिनमा संघलाई मधेश प्रदेशका घर घर सम्म पुर्याएर महिलाको हकहितका लागि संघर्षलाई निरन्तरता दिने प्रतिवद्धता पनि व्यक्त गरे।
सम्मेलनमा मधेश प्रदेशका विभिन्न जिल्लाबाट आएका महिला प्रतिनिधिहरूले आफ्नो विचार राख्दै संगठनलाई थप मजबुत बनाउन एकता, संघर्ष र संगठनात्मक विस्तारलाई प्राथमिकतामा राख्नुपर्ने आवश्यकता औंल्याए।
उनीहरूले महिला हिंसा, सामाजिक असमानता, बेरोजगारी, शिक्षा र स्वास्थ्य जस्ता क्षेत्रमा महिलाको पहुँच बढाउन राज्यलाई दबाब सिर्जना गर्ने प्रतिवद्धता जनाए।
संगठनले सम्मेलनलाई ऐतिहासिक उपलब्धिका रूपमा लिँदै महिलाको मुक्तिको अभियानलाई अझ सशक्त बनाउन सबै तह र तप्कामा अभियान सञ्चालन गर्ने निर्णय गरेको छ।
सम्मेलनमा विशिष्ट अतिथि संघकी केन्द्रीय अध्यक्ष अमृता थापा, नेकपा (माओवादी केन्द्र) का पोलिटब्यूरो सदस्य विश्वनाथ साह, प्रहलाद बुढाथोकी, महेन्द्र पासवान, श्रवण बरबरिया, केन्द्रीय सदस्य सीता पोखरेल, रूबी कर्ण, बोधमाया यादव, सीता दहाल, सुनीता यादव, शेख चाँद तारा, टेकबहादुर ब्लमपाकी लगायतका नेताहरू लगायतको उपस्थिति रहेको थियो ।
कार्यक्रममा अतिथि तथा नेकपा माओवादी केन्द्रकी केन्द्रीय सदस्य गीता कडेलले शुभकामना मन्तव्य दिँदै महिला आन्दोलनलाई अझ सशक्त बनाउन तथा मधेश प्रदेशमा महिलाहरूको सक्रिय सहभागिता सुनिश्चित गर्न संघले ऐतिहासिक जिम्मेवारी वहन गर्नुपर्ने बताइन्। उनले महिलाको अधिकार र समानताका सवालमा आन्दोलनलाई अझ व्यापक र गतिशील बनाउन संघले महत्वपूर्ण भूमिका निर्वाह गर्ने विश्वास व्यक्त गरिन्।
