जनकपुरधाम । प्रधानमन्त्री केपी शर्मा ओलीले जनकपुरमा पत्रकारहरुमाथि भएको आक्रमणका दोषीलाई कारवाही गर्न संकेत गरेका छन् । धनुषाको जनकपुरधाममा निर्मित मधेस प्रदेश प्रहरी कार्यालयको भवन उद्घाटन समारोहलाई सम्बोधन गर्ने क्रममा प्रधानमन्त्री ओलीले वार्ता र संवादबाट हल हुने विषयमा भौतिक आक्रमणमा उत्रिनु गलत भएको बताए ।
नेपाल पत्रकार महासंघ मधेस प्रदेशले आक्रमणकारीहरुलाई कारवाही गर्न माग गर्दै कार्यक्रमस्थलमै ज्ञापनपत्र बुझाएपछि सम्बोधनका क्रममा प्रधानमन्त्री ओलीले पत्रकारमाथि भएको आक्रमणको विषयमा कानूनी दायरामा ल्याएर कारवाही गर्न सम्बन्धित निकायलाई संकेत गरे । वकिलहरुको आक्रमणबाट घाईते भएका पत्रकार महासंघ मधेस प्रदेशका महासचिव शैलेन्द्र महतो ‘क्रान्ति’ पनि बैशाखी मै कार्यक्रम स्थलमा सहभागी थिए ।
उनीतर्फ देखाउदै प्रधानमन्त्री ओलीले भने, ‘उ त्यहाँ एकजना बैशाखी टेकेको भाईले यहाँ अगाडि देखा पर्दै हुनुहुन्थ्यो । केही भन्न खोजी राख्नु भएको छ । किन बैशाखी टेक्नुप¥यो उहाँले यसकुरातर्फ म प्रहरीको पनि ध्यानकर्षण गराउन चाहन्छु । प्रशासनको पनि ध्यानाकर्षण गराउन चाहन्छु । अर्को कुरा संवादबाट हुने कुरा, कानूनी प्रकृयाबाट हुने कुरा वार्ताबाट हुने कुरा जोरजुलुम गर्ने परिपाटी अन्त्य गरिनुपर्छ ।’
प्रधानमन्त्रीले सम्बोधनका क्रममा के भएको हो, बुझ्न र कारबाही अगाडि बढाउन प्रहरी प्रशासनलाई ध्यानाकर्षण गराएका छन् । प्रधानमन्त्री ओलीले ध्यानाकर्षण गराएपछि कार्यक्रममा सहभागी प्रहरी महानिरीक्षक दीपक थापाले पनि डायरीमा नोट गरेका छन् । अब यहाँका प्रहरी उपरीक्षक (एसपी) र प्रशासनले कसरी अनुसन्धान अगाडि बढाएर दोषीलाई पक्राउ गर्छन् भन्ने कुरा हेर्न बाँकी नै छ ।
प्रधानमन्त्रीले सार्वजनिक मञ्चमै सम्बन्धित निकायलाई ध्यानकर्षण सहित निर्देशन दिएपछि पत्रकारहरुमाथि भौतिक आक्रमणमा उत्रिएका वकिलहरुलाई कारवाही गर्न प्रहरी प्रशासनलाई भने दबाव बढेको छ । नेपाल पत्रकार महासंघ, मधेश प्रदेश समितिका सभापति श्याम बञ्जाराले आजै प्रधानमन्त्री ओलीलाई घटनासम्बन्धी फाइल बुझाएका थिए । यसले घटनाको गम्भीरतालाई थप उजागर गरेको छ। पत्रकारमाथि भएको आक्रमणको यो घटनाले प्रेस स्वतन्त्रतामाथि प्रश्न उठाएको छ, र प्रधानमन्त्रीको निर्देशनपछि यसमाथि न्याय हुने आशा गरिएको छ ।
