वीरगन्ज । मधेसको प्रमुख शैक्षिक धरोहरको रुपमा रहेको ठाकुरराम बहुमुखी क्याम्पस ३५ दिनभन्दा धेरै भयो नेतृत्व विहिन चलिरहेको छ । क्याम्पस प्रमुख रणजित कुमार यादव ३५ दिनदेखि क्याम्पसमा अनुपस्थित भएको ठाकुरराम बहुमुखी क्याम्पसका विद्यार्थी र कर्मचारीहरुले बतएका छन् ।
क्याम्पस प्रमुखले राजिनामा दिएको र क्याम्पसमा हाजिर नभएको कर्मचारी र विद्यार्थीहरुलाई बताउने गरेको भएपनि उनको राजिनामा स्वीकृत भने भएको छैन । त्रिभुवन विश्वविद्यालय स्रोतले उनको राजिनामा स्वीकृत नभएको जनाएको छ । तर, उनी ३५ दिनदेखि क्याम्पसमै आएका छैनन् । न त क्याम्पसमा कसैलाई निमित्त नै तोकेको छ ।
ठाकुराम बहुमुखी क्याम्पसमा अहिले सूचना प्रविधि विषयको स्नातक तह (बीआइटी) र विज्ञान संकायको (बिएस्सी सीएसआईटी) विषयको परीक्षा चलिरहेको छ । परीक्षाको केन्द्राध्यक्ष त्रिविले क्याम्पस प्रमुखलाई नै तोकेर पत्र पठाएको छ । तर, क्याम्पस प्रमुख उपस्थित छैनन् । बीआईटीका प्रमुख सञ्जय दासले सहायक केन्द्राध्यक्ष भएर काम गरिरहेका छन् ।
त्रिभुवन विश्वविद्यालय भन्दापनि पूरानो क्याम्पस जहाँ अध्ययन गर्नेहरु यो देशका प्रधानमन्त्री, दर्जनौ मन्त्री बनेका छन् । अहिलेपनि बहालवाला मन्त्रीहरु भएका छन् । यहाँ अध्ययन गर्नेहरु विभिन्न क्षेत्रमा पुगेका छन् । तरपनि यसको अवस्था भने दिनप्रतिदिन खस्किदै गएको छ । प्राज्ञिक थलोलाई राजनीतिक क्रिडा स्थल बनाएपछि ठाकुरराम बहुमुखी क्याम्पसको अवस्था नाजुक बन्दै गएको भन्दै प्राज्ञिक समूहले चिन्ता व्यक्त गरेका छन् ।
राजनीतिक भागबण्डमा क्याम्पस प्रमुख नियुक्त हुनेगर्दा पनि क्याम्पसले सही नेतृत्व पाउन नसकेको क्याम्पसका प्राध्यापक, शिक्षक, कर्मचारी र विद्यार्थीहरुले बताउने गरेका छन् । क्याम्पसको शैक्षिक सुधार र आचरण सुधारमा कसैको पनि ध्यान नजाँदा यसक्षेत्रको शैक्षिक धरोहरको साख खस्क्दिै गएको छ ।
यसैबीच क्याम्पस प्रमुख अनुपस्थित भएर क्याम्पसको दैनिक प्रशासनिक र शैक्षिक क्रियाकलाप नै प्रभावित भएपछि स्वतन्त्र विद्यार्थी युनियन र विभिन्न विद्यार्थी संगठनहरुको ध्यानाकर्षण भएको छ । स्वतन्त्र विद्यार्थी युनियन ठाकुराम बहुमुखी क्याम्पस इकाई समिति, अखिल नेपाल स्वतन्त्र विद्यार्थी युनियन (अनेरास्ववियु) र नेपाल विद्यार्थी संघ (नेविसंघ)ले संस्थागत रुपमा विज्ञप्ति जारी गरेर ध्यानाकर्षण गरेका हुन् । उनीहरुले अर्को क्याम्पस प्रमुख त्रिविले नपठाएसम्म तालाबन्दी गरेको जनाएका छन् ।
क्याम्पसको समस्याको विषयमा क्याम्पस प्रमुख रञ्जित प्रसाद यादवसँग उनको मोबाईल नम्बरमा सम्पर्क गर्दा सम्पर्क हुन सकेन ।
