वीरगन्ज । प्रतिनिधिसभाका सांसद डा.अमरेश कुमार सिंहले पर्सामा राष्ट्रिय स्तरको नेता जन्मिन नसक्दा राज्यबाट उपेक्षित हुनु परेको बताएका छन् । वीरगन्जमा सोमबार साँझ वीरगन्ज चिकित्सक समाजले आयोजना गरेको अन्तरकृयामा बोल्दै सांसद सिंहले भने, ‘पर्सामा कुनै राष्ट्रिय स्तरका नेताहरु नहुँदा यहाँको विकासमा हुन नसकेको हो ।’
नेपाली कांग्रेसका सभापति शेर बहादुर देउवा जति पटक प्रधानमन्त्री भएपनि उनी देशको प्रधानमन्त्री हुन नसकेको टिप्पणी गरे । नेपालको कून जनसंख्याको आधा मधेस प्रदेशमा भएपनि मधेसमा एउटा पनि सरकारी मेडिकल कलेजन नहुनु र सुदूरपश्चिम प्रदेश जहाँ जनसंख्या कम छ त्यहाँ दुईदुईवटा मेडिकल कलेज हुनुले पनि शेर बहादुर देउवा देशको नभई कुनै क्षेत्रको प्रधानमन्त्री भएको उनको भनाई थियो ।
संघीय सांसदमा चार कार्यकाल प्रतिनिधित्व गर्दा शासकहरुले कसरी शासन चलाईरहेका छन् भन्ने नजिकबाट अनुभव गर्न पाएको र अहिले सार्वजनिक निकायमा कसरी भ्रष्टाचार हुन्छ भन्ने कुरा आफूले जनताको माझमा ल्याउने प्रयास गरिरहेको बताए ।
पहिले प्रतिनिधिसभाको राज्य व्यावस्था परामर्श समितिमा रहेर काम गरेको र अहिले सार्वजनिक लेखा समितिमा रहेर काम गरिरहेको बताउदै आफूले यो देशको माटो र जनतालाई बुझ्ने प्रयास गरिरहेको बताए ।
अहिले उपभोत्ता अदालतको नाममा चिकित्सकहरुमाथि गरिएको निर्णय गलत भएको सांसद सिंहको टिप्पणी छ । उनले चिकित्सकहरुको नियमन र अनुगमन गर्ने निकाय चिकित्सा आयोग रहेको त्यसमा भएको केही गलत प्रावधानलाई संसोधन गर्न सकिने भन्दै चिकित्सकहरुलाई चिकित्सा आयोगबाटै कारवाही गर्नुपर्ने अभ्यासलाई निरन्तरता दिनुपर्नेमा जोड दिए ।
चिकित्सकको दरबन्दी, सुरक्षा र गुणस्तरीय सेवाको विषयमा आफूले संसदमा निरन्तर आवाज उठाउने प्रतिबद्धता पनि जनाए । वीरगन्ज चिकित्सक समाजका अध्यक्ष डा.उदयनारायण सिंहले सहजीकरण गरेको कार्यक्रममा वीरगन्जका बरिष्ठ चिकित्सक डाक्टर श्यामसुन्दर दासले चिकित्सा पेशमा रहेकाहरुलाई राज्यले दोश्रो नागरिकको जस्तो व्यवहार गर्ने गरेको गुनासो गरे ।
अध्ययनमा पनि उत्तीकै गहन अध्ययन अनुसन्धान गर्नुपर्ने र पेशा पनि अत्यन्त संवेदनशील पेशा भएपनि यसलाई समाजले सम्मानको दृष्टिले नहेर्दा चिकित्सकहरुको मनोबल कमजोर हुने गरेको बताए ।
नेपाल चिकित्सक संघ नारायणी शाखा वीरगन्जका अध्यक्ष डा.मनोज गुप्ताले चिकित्सकहरुमाथि विभिन्न बहानामा चौतर्फी आक्रमण भईरहेकोले पेशागत सुरक्षाको ग्यारेण्टी सहित स्वतन्त्र र निर्वाध रुपमा स्वास्थ्य उपचार सेवाको वातावरण बनाउन आग्रह गरे ।
