वीरगन्ज । वीरगन्जबाट प्रकाशित भोजपुरी टाईम्स दैनिक पत्रिकाको बार्षिकोत्सवको अवसरमा आदर्शनगर स्थित ‘आमाको माया छात्रावास’ मा सहयोग समाग्री वितरण गरेको छ । नेपालको एकमात्र भोजपुरी भाषाको दैनिक पत्रिका ‘भोजपुरी टाइम्स’ ११ बर्ष पूरा गरी १२ औं बर्षमा प्रवेश गरेको अवसरमा जनजाति कल्याण आश्रमद्वारा सञ्चालित ‘आमाको माया छात्रावास’ का आश्रित बालबालिकाहरूलाई खाद्यान्न र शैक्षिक सामग्री वितरण गरेर मानवताको सन्देश दिएको छ।
सामग्री वितरणका लागि आयोजना गरिएको कार्यक्रमका प्रमुख अतिथि नेपाल पत्रकार महासंघ मधेश प्रदेशका अध्यक्ष श्याम बञ्जाराले भोजपुरी टाइम्सको ११ वर्षे यात्रालाई भाषिक पत्रकारिताको क्षेत्रमा एक प्रेरणादायी उदाहरणको रूपमा प्रशंसा गरे।
उनले भने, ‘आजको प्रतिस्पर्धी मिडिया बजारमा एउटै टिमले ११ वर्षसम्म निरन्तर पत्रिका चलाउनु आफैँमा ठूलो उपलब्धि हो। यो पत्रकारिताको मात्र नभई भाषाको अस्तित्व र पहिचानको लडाइँको पनि यात्रा हो। भोजपुरी टाइम्सले मातृभाषाको पत्रकारितालाई राष्ट्रिय स्तरमा पुर्याउन सफल भएको छ।’
बञ्जाराले बालबालिकालाई दिइएको सहयोगले पत्रिकाले पत्रकारिताको साथसाथै मानवीय संवेदनशीलतालाई पनि प्राथमिकता दिएको प्रमाणित भएको बताए। उनले आगामी दिनमा पनि पत्रिकाले सत्य, तथ्य र निष्पक्ष पत्रकारितालाई निरन्तरता दिने विश्वास व्यक्त गरे।
कार्यक्रममा नेपाल पत्रकार महासंघ पर्सा शाखाका अध्यक्ष ओमप्रकाश खनालले पत्रिकाले भाषिक विविधता र सांस्कृतिक संरक्षणमा महत्वपूर्ण योगदान पुर्याएको बताए। प्रेस सेन्टर नेपाल मधेश प्रदेशका अध्यक्ष निरज पीठाकोटे मगरले मातृभाषाको पत्रकारितालाई समय र प्रविधिसँगै अगाडि बढाउनुपर्नेमा जोड दिए।
नेपाल पत्रकार महासंघका केन्द्रीय परिषद सदस्य राघव साहले पत्रकारिता आफैमा सामाजिक सेवा भएको र सामाजिक सेवामा लागेको भोजपुरी टाईम्स दैनिक पत्रिकारले बार्षिकोत्सवमा आश्रममा सहयोग सामग्री हस्तान्तरण गरेर थप सामाजिक भावनालाई दर्शाएको बताए ।
पत्रिकाका प्रकाशक अजय चौरसियाको अध्यक्षतामा भएको कार्यक्रममा कार्यकारी सम्पादक श्रवण साहले स्वागत मन्तव्य दिएका थिए भने पत्रकार श्याम सर्राफले कार्यक्रम सञ्चालन गरेका थिए। कार्यक्रममा विभिन्न सञ्चार माध्यममा आवद्ध सञ्चारकर्मीहरुको उपस्थिति रहेको थियो ।
