वीरगन्ज । मधेस प्रदेशको आर्थिक विकास र समृद्धिका लागि उखु खेतीलाई प्राथामितकामा राखेर किसानको समस्या सम्बोधन गर्नुपर्ने किसानहरुले जोड दिएका छन् ।
मधेस प्रदेश सरकारको भूमि व्यावस्था, कृषि तथा सहकारी मन्त्रालयले वीरगन्जमा आयोजना गरेको व्यावसायकि उखु खेती प्रवर्द्धनका लागि सरोकारवालाहरुसँगको अन्तरकृयामा सहभागी किसानहरुले किसान हरेक क्षेत्रमा राज्यको उपेक्षामा परेको बताउदै मधेसको मुख्य आर्थिक समृद्धिको एउटा खम्बाको रुमा रहेको उखु खेतीलाई व्यावसायिक प्रवर्द्धनमा मधेस प्रदेश सरकारको सकारात्मक पहल हुनुपर्ने बताएका छन् ।
कार्यक्रमका प्रमुख अतिथि भूमि व्यावस्था, कृषि तथा सहकारी मन्त्री जनार्दन सिंह क्षेत्रीले मधेसको मुख्य समस्या सिँचाई रहेकोले यसको सुविधाका लागि संघीय सरकारसँगको समन्वयमा कमला मरिण जस्तै नारायणी राप्ती डाईभर्सनको योजना अगाडि सार्नुपर्नेमा जोड दिए ।
कृषि मन्त्रालय किसानसँग प्रत्यक्ष संलग्न हुने मन्त्रालय भएकोले सिँचाई विभाग पनि कृषि मन्त्रालयमै हुनुपर्ने धारणा राखे । अहिलेको पानीको संकटमा डिप बोरिङ र स्याले ट्युबवेल दीर्घकालिन समाधान नभएको बताउदै चूरे संरक्षण एक मात्रै मधेसलाई मरुभूमिबाट बचाउने विकल्प रहेको बताए ।
पानी र सिँचाईको लागि एकीकृत व्यावस्थापन प्रणाली हुनुपर्ने बताउदै उनले आफ्नो स्वार्थका लागि चूरे विनास गर्नेहरुका कारण अहिले मधेसका जनताले भोग्नु परेको बताए । उनले कृषि मन्त्रालयले ऐन निर्माण गरिसकेको र छिट्टै नियमावली पनि ल्याउने तथा स्वास्थ्य स्वयंसेविका जस्तै जनताको प्रभावकारी कामका लागि कृषि महिला स्वयंसेविकाको अवधारणा ल्याईएको जानकारी दिए ।
वीरगन्ज चिनी कारखाना सञ्चालन हुन नसक्ने बताउदै उनले भने, ‘मरेको घोडालाई धेरै चावुकले नहिर्काऔं’ कार्यक्रममा भूमि व्यावस्था, कृषि तथा सहकारी मन्त्रालयका सचिव डा.उमेश दाहालले कृषि मन्त्रालयमा उखु खेती प्रवर्द्र्धनका लागि ६ करोड रुपैंया बजेट विनियोजन गरिएको जानकारी गराउँदै त्यसबाट किसानलाई के कस्था सुविधाहरु दिएमा उखु खेती प्रवर्द्धनमा सहयोग पुग्छ त्यसको किसानहरुबाट सुझाव संकलन गर्ने र किसानहरुबाट आएको राय सुझावको आधारमा योजना तर्जुमा गर्ने बताए ।
योजना तर्जुमा भईसकेपछि कार्यविधि बनाएर कार्यान्वयनमा लानका लागि सरोकारवालाहरुसँग अन्तरकृयाको आयोजना गरिएको सचिव डा.दाहालले बताए । कार्यक्रममा उखुबाली अनुसन्धान कार्यक्रम जीतपुरका बैज्ञानिक डा.दिलराज यादवले मधेसमा उखु खेतीःवर्तमान अवस्था र विकास सम्भावित उपायहरुको बारेमा कार्यपत्र प्रस्तुत गरेका थिए ।
त्यस्तै निर्देशनालयका बाली संरक्षण अधिकृत सुदीप चौधरीले उखु खेती प्रवर्द्धनका लागि मधेस प्रदेशमा भएका गतिविधिहरु तथा भावी योजनाहरुको बारेमा प्रस्तुतीकरण गरेका थिए । कार्यक्रममा वीरगन्ज उद्योग वाणिज्य संघका अध्यक्ष हरि गौतम, चिनी उत्पादक संघका अध्यक्ष राजेश केडिया, विभिन्न जिल्लाका कृषि ज्ञान केन्द्रका प्रमुख, किसान संघका अध्यक्ष तथा प्रतिनिधिहरुको सहभागिता रहेको थियो ।
