वीरगन्ज । आगामी भदौ १४ गते शनिबार वीरगन्जमा ‘बृहत् महिला सम्मेलन २०८२’ हुने भएको छ । पर्सा(बारा क्षेत्रका विभिन्न विधामा सक्रिय महिलाहरूको योगदानलाई उजागर गर्ने उद्देश्यले वीरगञ्ज उद्योग वाणिज्य सङ्घको महिला उद्यमशीलता विकास समितिले सम्मेलनको आयोजना गर्न लागेको हो ।
वीरगन्ज उद्योग वाणिज्य संघको सभाकक्षमा आज पत्रकार सम्मेलन गरेर ‘बृहत महिला सम्मेलन २०८२’ को आयोजना बारेमा जानकारी दिएको हो । सम्मेलनको प्रमुख अतिथि पूर्व राष्ट्रपति विद्यादेवी भण्डारीले उदघाटन गर्ने कार्यक्रम रहेको जनाएको छ ।
सम्मेलनमा ‘नारी शक्ति, समर्पण र सम्मान’ शीर्षकमा कार्यशाला गोष्ठी र विभिन्न प्यानल छलफलहरू पनि समावेश गरिएको वीरगन्ज उद्योग वाणिज्य संघ महिला उद्यम विकास समितिकी सभापति डा.लक्ष्मी थापा गुप्ताले जानकारी दिईन् ।
कार्यक्रमले महिला उद्यमीहरूको नेतृत्व क्षमता विकास गर्ने, उनीहरूको उद्योग–व्यापारमा सहभागिता बढाउने र समाजमा महिलाको पहिचान स्थापित गर्ने लक्ष्य राखेको गुप्ताले बताइन्। यस सम्मेलनले सहभागी महिलाहरूलाई उद्यमशीलता र राष्ट्र निर्माणमा अझ बढी प्रेरित गर्ने अपेक्षा राखिएको छ।
सम्मेलनमा उद्योग, व्यापार, शिक्षा, स्वास्थ्य र सामाजिक सेवाजस्ता क्षेत्रमा महत्त्वपूर्ण योगदान पुर्याएका ३०–४० जना महिलाहरूलाई सम्मान गरिनेछ। कार्यक्रम संयोजक निरज अग्रवालका अनुसार राष्ट्रिय स्तरमा स्थापित महिलाहरूको सहभागितामा विभिन्न विधामा प्यानल छलफल पनि हुनेछ।
वीरगन्ज उद्योग वाणिज्य संघका अध्यक्ष हरि गौतमले निजीक्षेत्रमा महिलाहरुको सहभागितालाई बढाउन र आधा आकाश ढाक्ने महिलाहरुलाई देशको अर्थतन्त्रमा समेत समान सहभागिता, समावेशी गराउनका लागि सम्मेलन महत्वपूर्ण हुने बताए । महिलाहरुको आत्मसम्मान, क्षमता अभिवृद्धि र आत्मनिर्भर बनाउनका लागि पनि सम्मेलन कोशेढुंगा हुने गौतमको भनाई छ ।
