काठमाडौं । नेकपा एमालेका सचिव तथा संघीय सांसद योगेश भट्टराईले प्रधानमन्त्री पुष्पकमल दाहाल ‘प्रचण्ड’ लाई संघीय निजामती सेवाको गठन, सञ्चालन र सेवाका सर्तसम्बन्धमा व्यवस्था गर्न बनेको विधेयकमा ‘कुलिङ अफ पिरियड’ बारे दिएको अभिव्यक्तिप्रति गम्भीर ध्यानाकर्षण भएको जनाउँदै स्पष्टीकरण माग गरेका छन्।
भट्टराईले आज सामाजिक सञ्जाल फेसबुक पेजबाट ‘कुलिङ अफ पिरियड’ का विषयमा प्रधानमन्त्री केपी ओलीलाई समेत छानबिन गर्नुपर्ने भन्ने प्रचण्डको भनाइप्रति आपत्ति जनाएका हुन्। उनले आफूहरू विधेयकमा ‘कुलिङ अफ पिरियड’ समावेश गर्नुपर्ने पक्षमा रहेको र यो संशोधन आफूहरू (सांसदहरू) ले नै राखेको स्पष्ट पारेका छन्।
भट्टराईले प्रचण्डको ‘कुलिङ अफ पिरियड’ प्रतिको अडानमाथि प्रश्न उठाएका छन्। उनले २०८० फागुन ११ गते संसदमा विधेयक दर्ता हुँदा प्रचण्ड नै प्रधानमन्त्री रहेको र उनकै अध्यक्षतामा बसेको मन्त्रिपरिषद् बैठकले विधेयकलाई संसदमा पेश गर्न स्वीकृति दिएको स्मरण गराएका छन्।
जसमा ‘कुलिङ अफ पिरियड’ का बारेमा कुनै व्यवस्था गरिएको छैन, ‘भट्टराईले भनेका छन्, ‘यसले स्पष्ट गर्दछ कि तपाईं ‘कुलिङ अफ पिरियड’ का पक्षमा हुनुहुन्थेन। आज विपक्षी बेन्चमा पुगेपछि एकाएक ‘कुलिङ अफ पिरियड’ को भूत कसरी जाग्यो ?’ उनले ‘कुलिङ अफ पिरियड’ सम्बन्धी बहस सांसदहरूको संशोधन प्रस्तावपछि मात्र सुरु भएको तथ्यमा प्रचण्डलाई हेक्का राख्न आग्रह गरेका छन्।
भट्टराईले प्रतिनिधिसभाको राज्य व्यवस्था तथा सुशासन समितिको वरिष्ठतम सदस्यका रुपमा प्रचण्डको भूमिकामाथि पनि प्रश्न उठाएका छन्। जुन समितिले ‘कुलिङ अफ पिरियड’ राख्ने निर्णय गरेको थियो । उनले भनेका छन्, ‘तर समितिको प्रतिवेदन संसदमा पेश गर्दा यो व्यवस्थालाई तलमाथि किन गरियो ? समितिको वरिष्ठतम सदस्यका हैसियतले तपाईंमाथि पनि नैतिक प्रश्न उठ्छ होइन र ? अनि छानबिन त तपाईमाथि नै गर्नुपर्ने हो कि ? भट्टराईले प्रचण्डलाई आफ्नै बोली आफ्नै लागि पासो नबनोस् भन्दै चेतावनी दिएका छन्।
