वीरगन्ज । पर्सा जिल्लामा क्रियाशील कम्युनिस्ट पार्टीहरूको एक बैठकले ’संयुक्त वाम अभियान पर्सा’ गठन गरेको छ । वीरगन्जको रानी सति धर्मशालामा सम्पन्न बैठकले जिल्लामा रहेका वामपन्थी शक्तिहरूलाई एकताबद्ध गरी साझा मुद्दामा अगाडि बढ्ने निर्णय गरेको हो ।
नवगठित कमिटीमा प्रत्येक पार्टीका जिल्ला अध्यक्ष वा एक जना प्रतिनिधि रहने व्यवस्था गरिएको छ। बैठकको अध्यक्षता नेकपा (एकीकृत समाजवादी) पर्साका अध्यक्ष बालगोपाल थापाले गरेका थिए।
नेकपा (एकीकृत समाजवादी) मधेश प्रदेश कमिटीका सदस्य सुबेदार यादवका अनुसार, कमिटीको नेतृत्व प्रत्येक दलले तीन–तीन महिनाका लागि आलोपालो गर्ने निर्णय भएको छ।
संयुक्त वाम अभियान पर्साको पहिलो चरणको नेतृत्व नेकपा (एकीकृत समाजवादी) का जिल्ला अध्यक्ष बालगोपाल थापाले गर्ने निर्णय पनि बैठकले गरेको छ। बैठकले अमेरिकाले प्यालेस्टाइनमाथि गरेको आक्रमणको विरुद्धमा श्रावण ११ गते (आइतबार) साँझ ६ बजे घण्टाघरमा प्लेकार्डसहित प्रदर्शन गर्ने निर्णय गरेको छ।
यस अभियानमा जनतासँग प्रत्यक्ष सरोकार राख्ने तमाम मुद्दाहरूलाई साझा बनाइ अगाडि बढ्ने सहमति भएको यादवले जानकारी दिए।
बैठकमा नेकपा माओवादी केन्द्रका वैकल्पिक केन्द्रीय सदस्य बाबुराम कौशिक, निवर्तमान जिल्ला संयोजक रामदरश कुशवाह, मोहम्मद सलाम,
नेकपा (एकीकृत समाजवादी) का विक्रम चौरसिया, बृजलाल पासवान, राष्ट्रिय जनमोर्चाका अच्छेलाल साह, हिमाल चन्द्र गौतम, नेपाल मजदुर किसान पार्टीका सरोज साह, वैज्ञानिक समाजवादी कम्युनिस्ट पार्टीका धनबहादुर श्रेष्ठ र नेपाल कम्युनिस्ट पार्टीका फिरोज सिको उपस्थिति रहेको थियो।
