वीरगन्ज । पर्सा जिल्लाको पकहामैनपुर गाउँपालिकाले औषधि खरिदमा अनियमितता गरेको पाइएको छ। गाउँपालिकाले वार्षिक खरिद योजना नबनाई, आवश्यकता पहिचान नगरी र पुल सिस्टमको आधारमा आपूर्ति नगरिकन साक्षी मेडिकल हल, वीरगन्ज पर्सालाई १५ लाख ८३ हजार भुक्तानी दिएको तथ्य खुलेको छ।
सार्वजनिक खरिद नियमावली २०६४ को नियम ८५ अनुसार औषधिसम्बन्धी मालसामानको उत्पादकले राष्ट्रियस्तरको समाचारपत्रमा सूचना प्रकाशन गरी तोकेको बिक्री मूल्यमा मात्र सोझै खरिद गर्न सकिने व्यवस्था छ। तर, गाउँपालिकाले यस नियमको पालना गरेको नदेखिएको महालेखाको लेखा परीक्षणले पुष्टि गरेको छ ।
नियमावलीअनुसार, पालिकालाई आवश्यक पर्ने औषधिमध्ये पालिकाबाट खरिद गर्नुपर्ने र तालुक निकायबाट प्राप्त हुने परिमाण यकिन गरी वार्षिक आवश्यकताको परिणाम विवरण तयार गरी पुल सिस्टमको आधारमा आपूर्ति व्यवस्थापन गर्नुपर्दछ। तर, यसको पालना नगरी खरिद गरिएको पाइएको छ।
आपूर्ति हुने औषधि वा अन्य सामानमा उत्पादन मिति, म्याद सकिने मिति, ब्याच नं. उत्पादक कम्पनीको नाम र निःशुल्क वितरणको लागि लगायतका सूचना उल्लेख हुनुपर्नेमा, आपूर्ति भएका औषधि तथा औषधिसम्बन्धी सामग्रीमा उल्लेखित सूचना पूर्ण रूपमा नभएको पाइएको जनाएको छ।
यसैगरी, आपूर्ति भएका औषधिको म्याद सकिने मिति भण्डार दाखिला समयदेखि कम्तीमा १८ महिना बाँकी हुनुपर्ने र भण्डारमा दाखिला गर्दा समेत उल्लेखित सबै विवरण खुलाउनुपर्ने प्रावधान छ। तर, गाउँपालिकाले यसको पनि यकिन नगरेको र औषधिको उपभोग र मौज्दात समेत यकिन नभएको प्रतिवेदनमा उल्लेख छ।
पालिकाले संघीय शसर्त बजेट उप शीर्षकबाट औषधि खरिद गरी साक्षी मेडिकल हल, वीरगन्ज पर्सालाई उक्त रकम भुक्तानी दिएको हो। आपूर्ति भएका औषधि एवं सर्जिकल सामान स्टोर दाखिला हुनुअघि स्पेसिफिकेसन अनुसार भए÷नभएको सम्बन्धित विषय विज्ञबाट मुचुल्का उठाई राख्नुपर्नेमा गाउँपालिकाले यसमा पनि कमजोरी गरेको पाईएको छ ।
गाउँपालिकाले औषधि खरिद, उपयोग र मौज्दातको अवस्था यकिन गरी औषधि खरिदलाई व्यवस्थित बनाउनुपर्नेमा जोड दिइएको छ। यस अनियमितताले गाउँपालिकाको आर्थिक पारदर्शितामाथि प्रश्नचिह्न खडा गरेको छ।
