काठमाडौं। सभामुख देवराज घिमिरेले संसदमा रहेका राजनीतिक दलहरूलाई संवाद र सहकार्यको माध्यमबाट दलीय सहमति कायम गर्न आह्वान गरेका छन्। संसद दिवसको अवसरमा सोमबार शुभकामना सन्देश जारी गर्दै उनले संसद्को गरिमा उच्च राख्न र जनअपेक्षाको सम्बोधनमा एक भएर अगाडि बढ्न आग्रह गरेका हुन्।
संसदको महत्त्व र जिम्मेवारी
नेपालमा पहिलो निर्वाचित प्रतिनिधिसभाको बैठक बसेको स्मरणमा प्रत्येक वर्ष असार १६ गते संसद दिवस मनाइन्छ। सभामुख घिमिरेका अनुसार आजको दिन लोकतन्त्र, संविधानवाद, जनताको अधिकार तथा जनताप्रति जनप्रतिनिधिको उत्तरदायित्वको स्मरण गर्ने दिन पनि हो।
संसदलाई जनताको सार्वभौमसत्ताको प्रयोग गर्ने एक प्रमुख संस्थाका रूपमा उल्लेख गर्दै उनले लोकतन्त्रको मूल आत्मा जनताको सहभागितामा निहित रहेको बताएका छन्। सन्देशमा भनिएको छ, “शासन व्यवस्थामा नीति निर्माण, कानून निर्माण तथा कार्यान्वयनको प्रभावकारी निगरानी जस्ता महत्वपूर्ण कार्य संसदमार्फत सम्पन्न गरिन्छ, संसदले व्यवस्थापकीय कार्यविधिको माध्यमबाट जनताको अभिमतअनुरूप नीति र कानून सुनिश्चित गर्दछ।” उनले जनताको स्वीकृतिबिना कर नलगाइने भन्ने लोकतान्त्रिक सिद्धान्तको सम्मान गर्दै संविधानले करसम्बन्धी सबै प्रस्तावहरू सभामा प्रस्तुत गर्नुपर्ने व्यवस्था गरेको पनि उल्लेख गरे।
संवाद, सहकार्य र सहमतिको आह्वान
सभामुख घिमिरेले लोकतान्त्रिक शासन प्रणालीको आधारभूत मर्म नै संवाद, सहकार्य र सहमति भएको जनाएका छन्। विविध राजनीतिक दलहरूबीच विचार, दृष्टिकोण र प्राथमिकताहरू फरक-फरक भए तापनि साझा राष्ट्रिय सरोकारका विषयमा दलीय सहमति आवश्यक र अपरिहार्य भएको उनको भनाइ छ। उनले संसद वादविवादको नभएर संवादको थलो बन्नुपर्नेमा जोड दिएका छन्।
उनले संसदलाई अझ प्रभावकारी, उत्तरदायी र जनउत्तरदायी बनाउनेतर्फ स्वतन्त्र प्रेस, नागरिक समाज र सचेत नागरिकको योगदानप्रति आभार प्रकट गरे। साथै, उनले संसदीय लोकतन्त्र प्राप्तिको आन्दोलनमा जीवन उत्सर्ग गर्ने शहीदप्रति भावपूर्ण श्रद्धाञ्जली अर्पण गर्दै राजनीतिक योद्धाको योगदानको स्मरण पनि गरेका छन्।
