१५ असार, वीरगन्ज । सशस्त्र प्रहरी बल, पर्साले विभिन्न स्थानबाट करिब ११ लाख ६६ हजार ६९० रुपैयाँ बराबरको अवैध सामानसहित ई–लोडर र मोटरसाइकल नियन्त्रणमा लिएको छ। बरामद गरिएका सबै सामान आवश्यक कारबाहीका लागि वीरगन्ज भन्सार कार्यालयमा बुझाइएको छ।
सशस्त्र प्रहरी बल, नेपाल, प्रथम सीमा सुरक्षा गुल्म वीरगन्जबाट खटिएको टोलीले असार १४ गते वीरगन्ज महानगरपालिका–१६, इनर्वास्थित सीमा नाकाबाट बोरामा प्याक गरी भारततर्फ निकासी गरिँदै गरेको ५ लाख ८ हजार रुपैयाँ बराबरको तामाको माने बरामद गरेको थियो। उक्त कार्यमा प्रयोग भएको ईलोडरसमेत नियन्त्रणमा लिई असार १५ गते वीरगन्ज भन्सार कार्यालयमा बुझाइएको सूचना अधिकारी तथा सशस्त्र प्रहरी नायव उपरीक्षक देबेन्द्र बहादुर सिंहले जानकारी दिए ।
सोही दिन, सोही गुल्मबाट खटिएको अर्को टोलीले वीरगन्ज महानगरपालिका–१६ कै भन्सार क्षेत्रबाट रक्सौलबाट वीरगन्जतर्फ आउँदै गरेको एक मोटरसाइकलको विभिन्न भागमा लुकाई छिपाई ल्याउँदै गरेको ४ लाख ६७ हजार रुपैयाँ बराबरको मोबाइल पार्ट्स बरामद गरेको छ। मोबाइल पार्ट्ससहित प्रयोग भएको मोटरसाइकलसमेत नियन्त्रणमा लिई असार १५ गते नै वीरगन्ज भन्सार कार्यालयमा बुझाइएको छ।
यस्तै, असार १५ गते सशस्त्र प्रहरी बल, नेपाल, प्रथम सीमा सुरक्षा गुल्म अलौबाट खटिएको टोलीले बिन्दवासिनी गाउँपालिका-४, झौवा चोकबाट भारतबाट अवैध रूपमा भन्सार छली नेपालतर्फ ल्याउँदै गरेको १ लाख ९१ हजार ६९० रुपैयाँ बराबरको किराना सामानसहित एक मोटरसाइकल नियन्त्रणमा लिएको छ। उक्त सामान पनि आवश्यक कारबाहीका लागि वीरगन्ज भन्सार कार्यालयमा बुझाइएको सशस्त्र प्रहरीले जनाएको छ।
