वीरगन्ज । नेपाली कांग्रेसका उपसभापति पूर्ण बहादुर खड्काले कांग्रेस पार्टीकै नेतृत्वमा संविधान संसोधन हुने बताएका छन् । नेपाली कांग्रेसले वीरगन्जमा आयोजना गरेको मधेस प्रदेश प्रदेश स्तरीय प्रशिक्षक प्रशिक्षण कार्यक्रमलाई सम्बोधन गर्दै उपसभापति खड्काले यस्तो बताएका हुन् ।
उनले संविधान संशोधनको आवश्यकतामाथि जोड दिँदै खड्काले जसरी कांग्रेसको नेतृत्वमा संविधान बनेको हो, त्यसैगरी संशोधन पनि कांग्रेसकै नेतृत्वमा हुने बताए। उनले संशोधनको विषयलाई अगाडि बढाउन संयन्त्र बनाएर काम भइरहेको जानकारी दिए। संविधान कार्यान्वयनमा देखिएका कमजोरीहरूलाई संशोधनमार्फत सुधार गरिने र समानुपातिक प्रतिनिधित्वलाई बढाइने उनको भनाइ थियो।
कांग्रेसले संघीयता र समावेशिताका मुद्दा जनतामा पुर्याउन चुकेको उपसभापति खड्काको भनाइ छ । उनले कांग्रेसले संघीयता र समावेशिताका मुद्दालाई जनतासमक्ष प्रभावकारी रुपमा पुर्याउन नसकेको स्वीकार गरेका छन्। वीरगन्जमा केन्द्रीय नीति, अनुसन्धान तथा प्रशिक्षण प्रतिष्ठानद्वारा आयोजित प्रशिक्षक प्रशिक्षण कार्यक्रममा बोल्दै खड्काले संघीयता मधेसवादीको र समावेशिता कम्युनिस्टको भन्ने भ्रम जनतामा रहेको बताए।
खड्काले २०६० सालमै पार्टीले संघीयता र समावेशितालाई अंगिकार गरे पनि यसलाई जनतासम्म पुर्याउन चुकेको स्वीकार गरे। उनले शेरबहादुर देउवाको नेतृत्वमै कांग्रेसले यी मुद्दालाई अगाडि सारेको स्पष्ट पारे। ‘हाम्रा मुद्दामा हामी चुक्यौं, उनले भने, ‘२०४६ सालदेखि आजसम्म गरेका मुद्दालाई जनताको अगाडि नै प्रशिक्षक प्रशिक्षण आवश्यक छ।’
उपसभापति खड्काले स्थानीय तह र प्रदेशबीचको समन्वय अभावलाई फुकाएर संविधान संशोधनको औचित्य पुष्टि गर्नका लागि जनतामा जाने बताए।
कांग्रेस भित्रको आन्तरिक विवादकै कारणले पार्टी कमजोर भएको बताउदै उनले भने, ‘कांग्रेसलाई हराउन कांग्रेस नै चाहिन्छ, अरूले हराउन सक्दैन ।’
नगरसभागृहमा शुरु भएको प्रशिक्षक प्रशिक्षण कार्यक्रममा मधेस प्रदेशका नेता तथा कार्यकर्ताहरुको उपस्थिति रहेको थियो । कार्यक्रमको सञ्चालन नेपाली कांग्रेस पर्साका उपसभापति रामनारायण कुर्मीले गरेका थिए ।
