काठमाडौं। इरानले मध्य इजरायलमा नयाँ मिसाइल प्रहार गरेको दाबी गरेको छ भने इजरायलले आफ्नो तर्फबाट इरानका परमाणु संरचना र तेल डिपोहरूमा धेरै प्रहार गरेको बताएको छ। यो विकसित घटनाक्रमसँगै दुई देशबीचको तनाव उत्कर्षमा पुगेको छ।
इरानमा इजरायली आक्रमण र क्षति:
ADVERTISEMENT
- इजरायलले इरानका परमाणु संरचनाहरूमा धेरै प्रहार गरेको दाबी गरेको छ।
- तेहरानको शाहरान तेल डिपोमा नयाँ इजरायली प्रहार भएको तेल मन्त्रालयले बताएको छ, जहाँ ठूलो आगलागी भएको पुष्टि गर्ने भिडियो फुटेजहरू सार्वजनिक भएका छन्।
- हाइफा तेल प्रसोधन केन्द्रनजिक पनि आगलागी भएको बीबीसीले पुष्टि गरेको छ, जुन इरानबाट प्रहार गरिएका मिसाइलको परिणाम मानिएको छ।
- इरानको उत्तर–पश्चिमी पूर्वी अजरबैजान प्रदेशका गभर्नर बहराम सरमस्तले त्यहाँ ३१ जनाको मृत्यु भएको बताएका छन्, जसमा ३० सैनिक कर्मचारी र एक रेड क्रेसेन्ट सदस्य समावेश छन्। ५५ जना घाइते भएको पनि उनले जनाए।
- इरानको सरकारी टेलिभिजनले तेहरानमा एक भवनमा इजरायली प्रहारमा २० बालबालिकासहित ६० जनाको मृत्यु भएको रिपोर्ट गरेको छ।
- इरानको दक्षिणी बुसेहर प्रदेशमा दुई प्रमुख ग्यास फिल्ड, दक्षिण पार्स ग्यास फिल्ड र फज्र जाम ग्यास रिफाइनिङ कम्पनीमा पनि इजरायली आक्रमण भएको तेल मन्त्रालयले विज्ञप्ति जारी गर्दै जनाएको छ।
इजरायलमा इरानी प्रहार र क्षति:
- इजरायलले इरानबाट इजरायलतर्फ प्रक्षेपण गरिएका क्षेप्यास्त्रहरू पत्ता लागेपछि देशका धेरै क्षेत्रमा सतर्कता सक्रिय गरिएको जनाएको छ।
- इजरायली आपतकालीन सेवा मागेन डाभिड एडम (एमडीए)ले पश्चिमी गालिलीमा दुईतले घरमा इरानी प्रहारका कारण १४ जना घाइते भएको जनाएको छ, जसमा एकजनाको अवस्था गम्भीर छ।
- एक २० वर्षकी महिलाको मृत्यु भएको र धेरै जना घाइते भएको पनि इजरायली आपतकालीन सेवाले बताएको छ।
आणविक वार्ता रद्द र राजनीतिक प्रतिक्रिया:
- अमेरिका र इरानले आइतबार इरानको परमाणु कार्यक्रमबारे वार्ता पुनः सुरु गर्ने तयारीमा रहेको बेला यो आक्रमण भएको हो। तर, मध्यस्थकर्ता देश ओमानका अनुसार अब यो वार्ता रद्द भएको छ।
- इरानी राष्ट्रपति मसौद पेजेस्कियानले इजरायलले आक्रमण नरोके अझ कडा प्रतिकार गर्ने चेतावनी दिएका छन्।
- इजरायली प्रधानमन्त्री बेन्जामिन नेतन्याहूले अंग्रेजीमा बोलेको एक भिडियो जारी गर्दै अमेरिकीहरूसँग समर्थनको अपिल गरेका छन्। उनले अमेरिकी राष्ट्रपति डोनाल्ड ट्रम्पलाई जन्मदिनको शुभकामना दिँदै अमेरिकी र इजरायली सेना दुवैले ‘अत्याचारी’ इरानी शासनविरुद्ध मध्यपूर्वमा स्वतन्त्रताको रक्षा गरिरहेको बताएका छन्। ह्वाइट हाउसले सुरुमा इजरायलको इरान आक्रमणबाट दूरी बढाउने प्रयास गरे पनि पछि यसलाई खुलेर समर्थन गरेको थियो। बीबीसी
